कक्षा १२ को वार्षिक परीक्षाको नतिजा सार्वजनिक – ५०.०९ प्रतिशत विद्यार्थी उत्तीर्ण

काठमाण्डौंः राष्ट्रिय परीक्षा बोर्डले कक्षा १२ को वार्षिक परीक्षाको नतिजा सार्वजनिक गरेको छ । सार्वजनिक नतिजा अनुसार यो वर्ष ५०.०९ प्रतिशत विद्यार्थी उत्तीर्ण भएका छन् ।

नियमित र ग्रेड वृद्धि गरी ४ लाख ४८ हजार विद्यार्थी सहभागी भएकामा करिब ५१.९१ प्रतिशत मात्र ग्रेडेड (उत्तीर्ण) भएका छन् । त्यस्तै ४९.०९ प्रतिशत भने नन ग्रेडेड भएका राष्ट्रिय परीक्षा बोर्डका अध्यक्ष महाश्रम शर्माले जानकारी दिनुभयो ।

गत वैशाख २६ गतेदेखि जेठ ५ गते सञ्चालित उक्त परीक्षाको नतिजा आज सार्वजनिक गरेको हो । नतिजा गत वर्षमा भन्दा यस बर्ष ३ प्रतिशतले सुधार भएको बोर्डले जनाएको छ ।

बोर्डले ३५ प्रतिशत भन्दा कम अङ्क ल्याउनेलाई नन ग्रेडेडमा राख्दै आएको छ ।

नतिजा प्रकाशनका लागि बोर्डले दिउँसो बैठक बोलाएको थियो । नतिजा प्रकाशन गर्ने निर्णयपछि बोर्डले पत्रकार सम्मेलन मार्फत नतिजा सार्वजनिक गरेको हो ।

परीक्षामा चार लाख ६७ हजार ३८९ विद्यार्थी सहभागी भएका थिए । जसमा ५६ हजारभन्दा बढी विद्यार्थीले ग्रेड वृद्धिका लागि परीक्षा दिएका थिए ।

५१ जनाको परीक्षा रद्द गरिएको जानकारी बोर्डका अध्यक्ष शर्माले जानकारी दिनुभयो । जिपिए ३.६१ देखि ४ ल्याउने विद्यार्थीको सङ्ख्या ६ हजार ९७६ छ ।

त्यसैगरी, ३.२१ देखि ३.६० सम्म ल्याउने विद्यार्थीको सङ्ख्या ३८ हजार ९९९ छ भने २.८१ देखि ३.२० ल्याउने परीक्षार्थीको सङ्ख्या ६९ हजार १७४ छ । यसैगरी जिपिए २.४१ देखि २.८० ल्याउने विद्यार्थीको सङ्ख्या ६३ हजार ७७ छ भने २.०१ देखि २.४० जिपिए ल्याउने विद्यार्थीको सङ्ख्या ११ हजार चार सय ३८ रहेको बोर्डले जनाएको छ ।

यस्तै १.६१ देखि २ सम्म जिपिए ल्याउने विद्यार्थीको सङ्ख्या ४७ रहेको छ भने एक लाख ८२ हजार ९२६ जना विद्यार्थीले कुनै ग्रेड प्राप्त गर्न सकेका छैनन् ।

परीक्षाफल बोर्डको आफ्नै वेबसाइट र नेपाल टेलिकमको विभिन्न प्लेटफर्मबाट थाहा पाउन सकिने व्यवस्था गरेको छ । लेटर ग्रेडिङ निर्देशिका अनुसार प्रत्येक विषयको सैद्धान्तिकतर्फ न्यूनतम ३५ प्रतिशत अङ्क प्राप्त गरे मात्रै विद्यार्थीले ग्रेड सिट प्राप्त गर्ने व्यवस्था छ । लेटर ग्रेडिङ निर्देशिकामा संशोधन गरेर जुन विषयमा नन ग्रेडेड (एनजी) हुन्छ त्यही विषयमा मात्रै ग्रेड वृद्धि परीक्षा दिनुपर्ने व्यवस्था गरिएको छ ।

सोही आधारमा अब विद्यार्थीले जति विषयमा नन ग्रेडेड आएको छ त्यति विषयको मात्र ग्रेड वृद्धिको परीक्षा दिन पाउनेछन् । यसअघि दुई भन्दा बढी विषयमा नन ग्रेडेड आएमा अर्को वर्ष सबै विषयको परीक्षा दिनुपर्ने बाध्यता थियो ।

गत वर्ष उक्त निर्देशिका संशोधन गरेर जति विषयमा नन ग्रेडेड आएको छ त्यतिको मात्र परीक्षा दिन पाउने व्यवस्था गरिएको थियो ।