बैङ्किङ साक्षरता शिक्षामा जोड्नुपर्ने – उपसभामुख इन्दिरा राना

काठमाडौँः प्रतिनिधिसभाका उपसभामुख इन्दिरा रानाले वित्तीय साक्षरतालाई उच्च माध्यमिक तहको शिक्षामा जोडेर लैजान आवश्यक रहेको बताउनुभएको छ ।

सङ्घीय संसद् र राष्ट्रिय वाणिज्य बैङ्कको सहकार्यमा प्रतिनिधिसभा र राष्ट्रियसभाका सदस्यलाई सञ्चालित वित्तीय साक्षरता कार्यक्रममा उहाँले वित्तीय साक्षरताको कमीले भ्रष्टाचार नियन्त्रण कठिन भइरहेको बताउनुभयो ।

उपसभामुख रानाले भन्नुभयो, “वित्तीय कारोबार अनुशासित बनाउँदा भ्रष्टाचार र अनियमितता केही हदसम्म रोक्न मद्दत गर्छ । आर्थिक अनुशासन कायम गर्न सहयोग पुग्छ ।” प्रतिनिधिसभा सदस्य ईश्वरबहादुर रिजालले बैङ्कहरूले नाफा मात्रै कमाउने नभई वित्तीय साक्षरता बढाउने दायित्व लिन पर्ने आवश्यकता औँल्याउनुभयो ।

सांसद रोशन कार्कीले आन्तरिक ऋण बढी उठाउँदा ब्याजदर र मूल्यवृद्धि बढाउन सक्नेतर्फ सरकारको ध्यानाकर्षण गराउँदै शेयर बजारलाई नेपाल राष्ट्र बैकले नराम्रो नियतले हेर्न नहुने धारणा राख्नुभयो । नेपाल मजदुर किसान पार्टीका सांसद प्रेम सुवालले बैङ्कहरूलाई जग्गा र सुनमा भन्दा उत्पादनमूलक क्षेत्रमा लगानी गर्न सुझाव दिनुभयो ।

कार्यक्रममा बैङ्किङ प्रणालीलाई बचत, लगानी र कर्जाका रुपमा मात्र नबुझी सानो उमेरदेखि बचत गराउने, पैसाको सदुपयोग गर्ने, अनावश्यक क्षेत्रमा लगानी कम गर्नेजस्ता विषयमा नागरिकलाई ज्ञान दिलाउन आवश्यक रहेको सहभागीको सुझाव थियो ।

कर्जा उपयोगिता, ऋण नतिर्दाको असर, सही रुपमा रेमिट्यान्स भित्र्याउने तरिका, भइरहेको हुन्डी कारोबार र त्यसबाट हुने जोखिमबारे आमनागरिकलाई शिक्षित तुल्याउन बैङ्कहरूले भूमिका निर्वाह गर्नुपर्ने कार्यक्रममा सहभागीहरूको भनाइ थियो ।

नेपाल राष्ट्र बैंकका पूर्व गभर्नर डा चिरञ्जीवी नेपाल, नेपाल बैंकर्स सङ्घका पूर्व अध्यक्ष भुवनकुमार दाहाल र राष्ट्रिय वाणिज्य बैंकका कार्यकारी अधिकृत देवेन्द्ररमण खनालले समग्र बैङ्किङ र वित्त विषयमा प्रशिक्षण दिनुभएको थियो ।

कार्यक्रममा सङ्घीय संसद्का सचिवालय सचिव सुदर्शन खड्काले वित्तीय नीति र मौद्रिक नीति कार्यक्रमको उद्देश्यमाथि प्रकाश पार्नुभयो ।