गणतन्त्रलाई संस्थागत गर्दै समृद्ध नेपाल निर्माणमा लाग्न राष्ट्रपतिको आग्रह

काठमाडौंः राष्ट्रपति रामचन्द्र पौडेलले संघीय लोकतान्त्रिक गणतन्त्रलाई संस्थागत गर्दै समृद्ध नेपाल निर्माणका लागि सबै मिलेर लाग्न आग्रह गर्नुभएको छ ।

भीमसेन थापा स्मृति प्रतिष्ठानले आज राष्ट्रपति कार्यालय शितलनिवासमा आयोजना गरेको भीमसेन थापा पुरस्कार वितरण समारोहलाई सम्बोधन गर्नुहुँदै राष्ट्रपति पौडेलले विभिन्न जातजाति संस्कृति र परम्परा रहेको नेपाललाई राष्ट्रिय एकतामा गाभ्दै अघि बढ्नुपर्ने बताउनुभयो ।

नेपालको स्वतन्त्रता र अखण्डताका लागि भीमसेन थापाको योगदान महत्वपूर्ण रहेको स्मरण गर्नुहुँदै राष्ट्रपति पौडेलले नेपालको इतिहासलाई विश्वव्यापीकरण गरेर नेपाल सधैँ स्वतन्त्र रहेको सन्देश प्रवाह गर्नु जरुरी रहेको पनि बताउनुभयो ।

सोही अवसरमा राष्ट्रपति पौडेलले राष्ट्रिय विभूति भीमसेन थापा पुरस्कार २०८१ बाट मृगेन्द्र सम्झना चिकित्सा गुठीका संस्थापक अध्यक्ष वरिष्ठ चिकित्सक डा मृगेन्द्रराज पाण्डेलाई सम्मानित गर्नुभयो ।

सो पुरस्कारको राशि सम्मान पत्रसहित १ लाख १ हजार १ सय ११ रुपैयाँ नगद रहेको छ ।

मृगेन्द्र सम्झना चिकित्सा गुठीले स्वास्थ्य, खानेपानी सरसफाई र बाल बचाउ अभियानमा दुर्गम तथा ग्रामीण क्षेत्रहरूमा महत्वपूर्ण कामहरू गर्दै आएको छ ।

पुरस्कार वितरण समारोहमा भीमसेन थापा स्मृति प्रतिष्ठानका अध्यक्ष पार्थिवेश्वर तिमिल्सिनाले उत्कृष्ट सामाजिक काम गर्दै आएका संस्था र व्यक्तिको सम्मानका लागि प्रतिष्ठानले वर्षेनि यस्तो पुरस्कार प्रदान गर्दे आएको बताउनुभयो ।

कार्यक्रममा प्रतिष्ठानका उपाध्यक्ष त्रिरत्न मानन्धर र पुरस्कृत व्यक्तित्व डा मृगेन्द्रराज पाण्डेले समाज सेवाको क्षेत्रमा आगामी दिनमा थप जिम्मेवारीका साथ अघि बढ्न यस कार्यक्रमबाट थप प्रेरणा प्राप्त भएको बताउनुभयो ।

राष्ट्रपतिको कार्यालय शितलनिवासमा आयोजित सम्मान कार्यक्रममा प्रथम महिला सविता पौडेलको पनि उपस्थिति रहेको थियो ।

कार्यक्रममा आज भएको सौर्य एयरलाइन्स विमान दुर्घटनामा ज्यान गुमाएकाहरूप्रति एक मिनेट मौनधारण गरिएको थियो ।