माघ २८, २०८१ सोमबार February 10, 2025

प्रतिनिधिसभामा विभिन्न अध्यादेश पेस

प्रतिनिधिसभाको अर्को बैठक माघ २४ गते दिउँसो १ बजे बस्ने

शेयर गर्नुहोस:
फन्ट परिवर्तन गर्नुहोस:

काठमाडौंः प्रतिनिधिसभामा विभिन्न अध्यादेश पेस भएका छन्। प्रतिनिधिसभाको शुक्रबारको बैठकमा सरकारले ल्याएका अध्यादेशहरू पेस भएका हुन्।

प्रधानमन्त्री केपी शर्मा ओलीका तर्फबाट सञ्चार तथा सूचना प्रविधिमन्त्री पृथ्वीसुब्बा गुरुङले ‘सुशासन प्रवद्र्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने अध्यादेश, २०८१’ सभासमक्ष पेस गरे।

उपप्रधानमन्त्री एवं अर्थमन्त्री विष्णुप्रसाद पौडेलले ‘आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, २०८१’, निजीकरण (पहिलो संशोधन) अध्यादेश, २०८१’ र आर्थिक तथा व्यवसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने अध्यादेश, २०८१’ सभासमक्ष पेस गरे।

प्रतिनिधिसभामा विभिन्न अध्यादेश पेसअध्यादेश पेस गर्दै उनले बजेट तथा कार्यक्रम तर्जुमालाई व्यवस्थित गर्न अध्यादेश ल्याइएको बताए।

त्यस्तै भूमि व्यवस्था, सहकारी तथा गरिबी निवारणमन्त्री बलराम अधिकारीले ‘सहकारीसम्बन्धी केही नेपाल ऐनलाई संशोधन गर्ने अध्यादेश, २०१८ र भूमिसम्बन्धी केही नेपाल ऐनलाई संशोधन गर्ने अध्यादेश, २०८१’ सभासमक्ष पेस गरे।

बैठकमा सभामुख देवराज घिमिरेले पूर्वसभामुख दमननाथ ढुङ्गाना, संविधानसभा सदस्य रामजीप्रसाद शर्मा, संविधानसभा सदस्य अब्दुलहमिद सिद्धिकी र प्रतिनिधिसभाका पूर्वसदस्य प्रेमलाल (पीएल) सिंहको निधनमा शोक प्रस्ताव प्रस्तुत गरेका थिए। शोक प्रस्तावलाई सर्वसम्मत रूपमा पारित भएको थियो।

प्रतिनिधिसभाको अर्को बैठक माघ २४ गते दिउँसो १ बजे बस्ने छ।

युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।

यो खबर पढेर तपाईलाई कस्तो महसुस भयो ?

प्रतिक्रिया