मनाङमा तय भएको उपनिर्वाचन स्थगित

काठमाडौं । कात्तिक १७ गतेका लागि तय गरिएको मनाङ क्षेत्र नम्बर १ ‘ख’ मा हुने उपनिर्वाचन स्थगित गरिएको छ। आज बसेको निर्वाचन आयोगको बैठकले वर्तमान परिस्थितिका कारण निर्वाचन कार्यतालिका प्रभावित भएकाले तत्कालका लागि उपनिर्वाचन नगर्ने निर्णय गरेको हो।

आयोगका कार्यवाहक प्रमुख आयुक्त रामप्रसाद भण्डारीका अनुसार, छिट्टै नयाँ कार्यतालिका सार्वजनिक गरी दलहरूलाई पुनः निर्वाचन प्रक्रियामा सहभागी हुन आह्वान गरिनेछ।

सर्वोच्च अदालतको आदेशपछि गण्डकी प्रदेशसभा सदस्य राजीव गुरुङ (दीपक मनाङे) पदमुक्त भएपछि सो क्षेत्र रिक्त रहेको छ। मनाङे माथि ज्यानमार्ने उद्योग मुद्दामा दोषी ठहर गर्दै अदालतले उनलाई ६ वर्षसम्म निर्वाचनमा प्रतिस्पर्धा गर्न अयोग्य ठहर गरेको थियो।