‘संसद् विघटन गर्ने नै आज पुनर्स्थापना खोज्दै हिँडे – संयोजक प्रचण्ड

काठमाडौं, १२ मंसिर । नेपाली कम्युनिस्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले एमाले अध्यक्ष केपी शर्मा ओलीलाई ‘उल्टो बुद्धि भएको नेता’ को संज्ञा दिँदै कडा प्रहार गरेका छन्।

शुक्रबार धनगढीमा आयोजित नेकपाको एकता सन्देश सभालाई सम्बोधन गर्दै प्रचण्डले ओलीको निर्णय र राजनीतिक शैलीकै कारण देश र जनताले निरन्तर दुःख भोग्नुपरेको दाबी गरे।

प्रचण्डले संसद् विघटन प्रकरणलाई आँखीझ्याप गर्दै भने,“हिजै संसद् विघटन गर्नेहरू, आज भने विघटन भए पनि चुनाव होइन पुनर्स्थापना चाहिन्छ भन्छन्। कस्तो उल्टो बुद्धि ! जतिबेला पनि उल्टो बाटो हिँडेर जनतालाई दुःख दिने। अब यस्ता अहङ्कारी र दम्भी नेतालाई सबक सिकाउने समय आएको छ।”

उहाँले २१ फागुनमा नै प्रतिनिधिसभा चुनाव गराउनुको विकल्प नभएको जिकिर गर्दै आगामी निर्वाचनमा नेकपा पहिलो शक्ति बन्नेमा कुनै शक्ति रोक्न नसक्ने दाबी पनि दोहोर्‍याउनुभयो।

दाहालले पार्टी एकताले जनतामा नयाँ उत्साह फैलिएको बताउँदै, नेकपालाई ठूलो जनसमर्थन मिलिरहेको र आगामी राजनीतिक यात्रामा निर्णायक मोड ल्याउने जिम्मेवारी आफूहरूकै काँधमा रहेको उल्लेख गरे।