वीरगन्जमा ‘रेल्वे म्युजियम’ निर्माणको तयारी सुरु, बीपी उद्यान नजिक सरसफाइ अभियान

वीरगञ्ज । वीरगन्ज महानगरपालिका–९ घण्टाघर छेउको बीपी उद्यान नजिक उत्तरतर्फ रहेको रेल्वेको खाली जग्गामा महानगरपालिकाले ‘रेल्वे म्युजियम’ निर्माणका लागि तयारी थालेको छ ।

गत असार ९ गते महानगरपालिकाको १३ औँ नगर सभामा मेयर राजेशमान सिंहले प्रस्तुत गरेको चालू आर्थिक वर्ष २०८२/८३ को नीति तथा कार्यक्रममा वीरगन्ज नेपालको पहिलो रेल सेवा (रक्सौल–अमलेखगन्ज रेल सेवा) प्रारम्भ भएको ऐतिहासिक सहर भएको भन्दै रेल्वे सेवा स्थापना भएको १०० वर्ष पुरा भएको अवसरमा पुराना रेल्वे संरचनाहरूलाई संरक्षण र पुनः प्रयोग गर्दै ‘रेल्वे म्युजियम’ निर्माणको कार्य अगाडि बढाइने घोषणा गर्नुभएको थियो ।

त्यही घोषणा अनुरुप विपी उद्यान छेउको जग्गामा अहिले महानगरपालिकाले ‘रेल्वे म्युजियम’ निर्माणका लागि तयारी थालेको हो । त्यसका लागि आज त्यहाँ रहेका रेल्वेका पुराना संरचनाका साथै झाडी, रुखहरू फाँडेर सरसफाइ गरिएको छ । रेल्वे म्युजियम निर्माण हुने स्थानलाई सफा र व्यवस्थित बनाउन सरसफाइ गरिएको हो ।

वीरगन्ज महानगरपालिका, ग्रीन सिटी प्रहरी सामुदायिक केन्द्र, सशस्त्र प्रहरी बल र नेपाली सेनाको संयुक्त सहभागितामा सरसफाइ गरिएको हो ।

सरसफाइ कार्यक्रममा वीरगन्ज महानगरपालिकाका मेयर राजेशमान सिंह, पर्साका प्रमुख जिल्ला अधिकारी भोला दाहाल, प्रहरी उपरीक्षक सुदीपराज पाठक, ग्रीन सिटी प्रहरी सामुदायिक केन्द्रका अध्यक्ष जयप्रकाश खेतान, वीरगन्ज महानगरपालिकाका प्रमुख प्रशासकीय अधिकृत अरविन्दलाल कर्ण लगायतको सहभागिता रहेको थियो ।

कार्यक्रममा सहभागीहरूले स्थानीय तह, सुरक्षा निकाय र समुदायको सहकार्यमा रेल सङ्ग्रहालय निर्माणको प्रारम्भिक चरण अघि बढ्दै गएको बताउँदै यसले सहरको पहिचान, पर्यटन प्रवद्र्धन र ऐतिहासिक सम्पदा संरक्षणमा महत्वपूर्ण योगदान पुर्‍याउने विश्वास व्यक्त गरेका छन् ।