मुलुकलाई निकास दिन ताजा जनादेश उपयुक्त : कमल थापा

काठमाडौं: राष्ट्रिय प्रजातन्त्र पार्टीका अध्यक्ष कमल थापाले बिक्रम सम्बत २०६२/०६३ पछिको मार्गचित्र असफल प्रमाणित भएको दाबी गरेका छन् ।

ट्वीट गर्दै अध्यक्ष थापाले पछिल्लो राजनीतिक घटनाक्रमले लोकतान्त्रिक आन्दोलनपछिको मार्गचित्रलाई असफल सिद्ध गरेको बताएका हुन् ।

आफ्नै दलको प्रधानमन्त्रीविरुद्ध अविश्वासको प्रस्ताव र संसद विघटन, अदालतमा विचराधीन मुद्दामाथि सडकमा प्रदर्शनले त्यसलाई पुष्टि गरेको उनको भनाइ छ ।

अध्यक्ष थापाले व्यवस्थापिका प्रमुखद्वारा कार्यपालिका र न्यायपालिका प्रमुखविरुद्द अदालतमा मुद्दा लगायतका घटनाले पनि मार्गचित्रलाई असफल भएको उल्लेख गरेका छन् ।

थापाले पछिल्लो समय मुलुकलाई निकास दिन ताजा जनादेश उपयुक्त हुने धारणा राख्दै आएका छन् । राप्रपाले पछिल्लो आन्दोलनपछि हटाइएको राजसंस्था र हिन्दु राज्यको पक्षमा आवाज उठाउँदै आएको छ ।