निर्वाचन आयोगको भूमिकाप्रति उपेन्द्र यादवको आपत्ति (विज्ञप्ती)

काठमाडौंः जनता समाजवादी पार्टीका अध्यक्ष उपेन्द्र यादवले निर्वाचन आयोगले लोकतान्त्रिक मूल्य, मान्यता, विधि र पद्धति तिरस्कार गरेको बताएका छन् ।

अध्यक्ष यादवले मंगलबार विज्ञप्ति जारी गरेर निर्वाचन आयोगको भूमिकाप्रति आपत्ति जनाएका हुन् । ‘निर्वाचन आयोगबाट निष्पक्ष, तटस्थ भूमिका निर्वाह हुन नसकेको र पूर्वाग्रहपूर्ण रहेको हाम्रो निष्कर्ष छ । निर्णयमा राजनीतिक दलको बहुमतको निर्णय मान्य हुने लोकतान्त्रिक मूल्य, मान्यता, विधि र पद्धतिको सम्पूर्ण रुपले अवज्ञा, उपेक्षा र तिरस्कार गरिएको छ,’ विज्ञप्तिमा जनाईएको छ ।

निर्वाचन आयोगले बिनापूर्वाग्रह निष्पक्ष र तटस्थ ढंगबाट निर्णय गर्नुपर्ने यादवको भनाइ छ । निर्वाचन आयोगले गरेको उक्त निर्णयको विरुद्धमा राजनीतिक र कानुनी उपचारमा जाने पनि उनले चेतावनी दिएका छन् । जसपासम्बन्धी अनिर्णित बन्दा आयोगमाथि शंका उत्पन्न भएको पनि उनले उल्लेख गरेका छन् ।

निर्वाचन आयोगको जेठ ३० गतेको बैठकले जसपाको विवादमा कुनै पनि निर्णय दिनबाट अस्वीकार गरेको थियो । अध्यक्षद्वय महन्थ ठाकुर र उपेन्द्र यादवले एक-अर्को पक्षलाई गरेको कारबाहीको निर्णयअनुसार आयोगमा उक्त दलसम्बन्धी विवरण अद्यावधिक गर्न अस्वीकार गरेको हो ।