राप्रपाको केन्द्रीय विशेष समिति र निर्देशन समिति गठनः सचिवालय कार्य व्यवस्था समिति खारेज

काठमाडौंः राष्ट्रिय प्रजातन्त्र पार्टी (राप्रपा)ले केन्द्रीय विशेष समिति र केन्द्रीय निर्देशन समिति गठन गरेको छ।

शुक्रबार अध्यक्षत्रय कमल थापा, पशुपति शम्शेर जबरा र डा. प्रकाशचन्द्र लोहनीको बैठकले केन्द्रीय विशेष समिति र केन्द्रीय निर्देशन समिति गठन गरेको हो । दुवै समितिमा संस्थापक अध्यक्ष एवं पूर्वप्रधानमन्त्री लोकेन्द्रबहादुर चन्दलाई पदेन सदस्य कायम राखेको छ।

केन्द्रीय विशेष समिति र केन्द्रीय निर्देशन समितिमा तीनै जना अध्यक्ष रहेका छन्। यसअघि गठन गरिएको सचिवालय कार्यव्यवस्था समिति खारेज गरिएको राप्रपाले जनाएको छ।

यी दुई समितिहरुले विधानको परिधिभित्र रहेर पार्टीको वैचारिक, साँगठनिक र अन्य महत्वपूर्ण बिषयमा पार्टीलाई मार्गनिर्देश गर्नेछ । निर्देशन समितिको बैठक नबसेको अवस्थामा निर्देशन समितिले गर्नुपर्ने निर्णयहरु केन्द्रीय विशेष समितिले गर्नेछ ।

पार्टीका शीर्ष नेताहरुको प्रतिनिधित्व रहनेगरी विशेष समिति बनाइएको भए पनि धवल शम्सेर राणालाई समावेश नगरिएको भन्दै पार्टीभित्र असन्तुष्टि देखिएको छ ।

पार्टीका उपाध्यक्ष र महामन्त्री समेत रहिसकेका धवलशमशेर राणालाई समावेश गरिएको छैन । पार्टीभित्र राणाले आगामी महाधिवेशनबाट आफूलाई नेतृत्वको दावेदारको रुपमा प्रस्तुत गर्दै आएका छन् । अध्यक्ष कमल थापा लगायत नेतृत्वको कार्यशैलीको विरोध गरेकै कारण नियतवश विशेष समितिमा नराखिएको आरोप लगाए ।

पार्टीले गठन गरेको केन्द्रीय निर्देशन समितिमा चाहिँ नेपालगन्ज उपमहानगरपालिकाका मेयर समेत रहेका राणालाई राखिएको छ । विशेष समिति पार्टी सञ्चालनको शक्तिशाली कमिटीमा मानिन्छ ।