निर्वाचन आयोगले कानूनी व्यवस्था उल्लंघन गरेको पाँच दलको आरोप (विज्ञप्ती)

काठमाण्डौंः नेपाली कांग्रेस लगायतका पाँच दलले निर्वाचन आयोगले निरन्तर कानूनी व्यवस्था, स्थापित मान्यता र परम्परा उल्लंघन गरेको आरोप लगाएका छन्।

कांग्रेस, नेकपा (माओवादी केन्द्र), नेकपा (एमाले) माधव नेपाल समूह, जनता समाजवादी पार्टी (जसपा) उपेन्द्र यादव पक्ष र राष्ट्रिय जनमोर्चाले निर्वाचन आयोगको व्यवहारले लोकतान्त्रिक अभ्यासमै आँच आउने निष्कर्ष निकालेका हुन्। राजनीतिक दल सम्बन्धी विवादमा आयोगले निर्धारित जिम्मेवारी अनुरूप निष्पक्ष रूपमा काम नगरेको पाँच दलको आरोप छ।

लोकतन्त्रको मूल आधार निर्वाचनको निष्पक्षता सुनिश्चित गर्ने दायित्व रहेको निर्वाचन आयोगलाई नियन्त्रण गर्ने षड्यन्त्र भइरहेको जारी विज्ञप्तिमा उल्लेख छ।