काठमाडौंः पछिल्ला केही वर्ष यता लगातार रुपमा घट्दै गएको नेपाल टेलिकमको ल्यान्डलाइन सेवाको बजार फाइबर टु दि होम (एफटीटीएच) सेवा विस्तार हुन थालेसँगै सुधार हुन थालेको छ ।
कम्पनीको एफटीटीएच भ्वाइस सेवा (फाइबरलाइनमा फिक्सलाइन अर्थात ल्यान्डलाइन टेलिफोन) प्रयोग गर्नेको सङ्ख्या मात्रै करिब एक लाख ६४ हजार पुगेको हो ।
मोबाइल सेवाको लोकप्रियता बढ्दै गएसँगै पछिल्ला तीन वर्षमा टेलिकमको फिक्सलाइन टेलिफोन सेवाका ग्राहक घट्दै गएका थिए । टेलिकमको फिक्स टेलिफोन सेवा (पीएसटीएन, डब्लूएलएल, भी-स्याट र फाइबर) मा २०७४ कात्तिकमा ८ लाख ५७ हजार १६९ ग्राहक रहेकोमा गत वर्षको कात्तिकसम्म घटेर ७ लाख ४० हजार ९७२ मा सीमित भएको थिए ।
तर कम्पनीले एउटै अप्टिकल फाइबरमा उच्च गतिको इन्टरनेटसँगै फिक्स टेलिफोन सेवा समेत दिन थालेपछि कम्पनीको फिक्स टेलिफोन सेवा प्रयोग गर्ने ग्राहक बढेका हुन् । यस वर्षको कात्तिकसम्म आइपुग्दा टेलिकमको फिक्स भ्वाइस सेवा प्रयोग गर्ने ग्राहक सङ्ख्या ८ लाख १७ हजार ५७३ पुगेका छन् ।
फिक्स टेलिफोन सेवाअन्तर्गत एफटीटीएच बाहेक पीएसटीएन, डब्लूएलएल र भी-स्याट सबैमा ग्राहक घट्दै गएका छन् । हाल टेलिकमले एउटै फाइबर मार्फत इन्टरनेट, टेलिफोन र आईपीटिभी सेवा उपलब्ध गराउँदै आएको छ । -टेकपाना
| फिक्स भ्वाइस सेवा | २०७४ कात्तिक | २०७५ कात्तिक | २०७६ कात्तिक | २०७७ कात्तिक | २०७८ कात्तिक |
| पीएसटीएन | ६,८९,५८९ | ६,७८,०५९ | ६,७६,२०६ | ६,२२,२५५ | ५,३६,०२२ |
| डब्लूएलएल | १,२१,०३१ | १,२०,६७३ | १,१९,०९२ | १,१८,१३६ | १,१७,५३० |
| एफटीटीएच | – | – | – | – | १,६३,९३५ |
| भी-स्याट | – | ५८१ | ५८१ | ५८१ | ८६ |
| जम्मा | ८,५७,१६९ | ८,५२,४३३ | ७,९५,८७९ | ७,४०,९७२ | ८,१७,५७३ |
प्रतिक्रिया