पूर्व र बहालवाला उपकुलपतिद्वारा सरकारी कदमको विरोध

काठमाडौंः बीपी कोइराला स्वास्थ्य विज्ञान प्रतिष्ठान सञ्चालन ऐन र नियमावलीविपरीत सरकारको निर्णयको १ जना बहालवाला र ७ जना पूर्वउपकुलपतिले विरोध गरेका छन् ।

गत पुस ३० गते बसेको मन्त्रिपरिषद्को बैठकले अघिल्लो सरकारले नियुक्त गरेका उपकुलपति ज्ञानेन्द्र गिरीसहित शिक्षाध्यक्ष गुरु खनाल, रजिस्टार र अस्पताल निर्देशक गौरी साहलगायतलाई काम गर्नबाट रोकेको छ । सरकारको सो कार्यविरुद्ध बहालबाला तथा पूर्वउपकुलपतिले मंगलबार विज्ञप्ति जारी गर्दै विरोध गरेका हुन् ।

सोही दिन सरकारले स्वास्थ्य तथा जनसंख्या मन्त्रालयलको प्रमुख विशेषज्ञ टोलीले अस्पताल सञ्चालन तथा प्रतिष्ठानको दैनिक काम गर्ने निर्णय गरेको थियो ।

सरकारलाई विधिको शासन, प्राज्ञिक स्वायत्तता र स्वतन्त्रता रक्षाका लागि मन्त्रिपरिषद्को उक्त निर्णय फिर्ता लिन उपकुलपतिले आग्रह गरेका छन् ।

यसरी विज्ञप्ति जारी गर्नेमा मधेस स्वास्थ्य विज्ञान प्रतिष्ठान जनकपुरका प्राडा रामकेवल साह, पूर्वउपकुलपतिहरू प्राडा भरतकुमार यादव, तोरणबहादुर कार्की, प्राडा उपेन्द्रकुमार कोइराला, प्राडा गणेशबहादुर गुरुङ, प्राडा कुलप्रसाद कोइराला, प्राडा कैलाशनाथ प्याकुरेल र प्रा. चिरञ्जीवी शर्मा छन् । सरकारको यो निर्णयविरुद्ध प्राडा गीरीले सर्वोच्च अदालतमा मुद्दा दायर गरेका छन् । राजधानी