सिके राउतको दौडधुप : एकैदिन प्रधानमन्त्री, गृहमन्त्री र प्रचण्डसँग भेटवार्ता

काठमाडौंः जनमत पार्टिका अध्यक्ष एवं नवनिर्वाचित प्रतिनिधीसभा सांसद डा. सिके राउत नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ भेट्न खुमलटार पुगेका छन् ।

प्रधानमन्त्री शेरबहादुर देउवासहितका कांग्रेसका नेताहरुसँग बालुवाटारमा भेटेर सत्ता गठबन्धनमा सहभागी हुने सहमति जनाएका राउतले गृहमन्त्री बालकृष्ण खाँण भेटेलगत्तै प्रचण्ड भेट्न खुमलटार पुगेका हुन् ।

राउतले बिहीबार दाहाल र खाणसँग छुट्टाछुट्टै भेटवार्ता गरेका हुन् । माओवादी केन्द्रका अध्यक्ष दाहालसँग भेटेर शुभकामना आदानप्रदान गरेको दाहालकी स्वकीय सचिव गंगा दाहालले जनाइन् ।

यस्तै राउतले गृहमन्त्री खाणलाई सरकारी निवास पुल्चोकमा पुगेर भेट गरेका हुन् । गृहमन्त्री खाणले सप्तरी–२ बाट प्रतिनिधिसभा सदस्यमा निर्वाचित भएकोमा राउतलाई बधाई दिएका थिए ।

भेटवार्तामा दुई नेताबीच मुलुकमा शान्ति, सुशासन र स्थिरतामा कसरी ल्याउन सकिन्छ भन्नेबारे कुराकानी भएको गृहमन्त्री खाणको सचिवालयले जनाएको छ ।

त्यस्तै आगामी दिनमा सहमति र सहकार्य कसरी गर्न सकिन्छ भन्नेबारे पनि उहाँहरुबीच कुराकानी भएको बताइएको छ ।