नयाँ सरकार गठनका लागि एमाले माओवादीको कसरत, कांग्रेस सशंकित

काठमाडौंः नयाँ सरकार गठनको आह्वान हुनुपूर्व कम्युनिष्ट नेताहरूको दौडधुप तीव्र बनेको छ । आमनिर्वाचन २०७९ मा पहिलो दल बनेको नेपाली कांग्रेसले सरकार गठनका लागि बहुमत जुटाउन तीव्रता दिइरहेका बेला कम्युनिष्ट नेताहरूबीच समेत भेटवार्ताको क्रम बढेको छ ।

तत्कालीन सत्ता गठबन्धनमा रहेको नेकपा माओवादी केन्द्र र नेकपा एमालेबीचको हिमचिम पछिल्लो समय बढ्न थालेको आंकलन छ । प्रतिनिधिसभामा प्रत्यक्षतर्फको नतिजा सार्वजनिक भइरहँदा एमाले अध्यक्ष केपी शर्मा ओलीले माओवादी अध्यक्ष पुष्पकमल प्रचण्डलाई टेलिफोनमार्फत बधाई दिँदै सहकार्यको छनक देखाएका थिए ।

तत्पश्चात् एमाले र माओवादीका दोस्रो तथा तेस्रो तहका नेताहरू वाम गठबन्धनको सरकार गठन हुनुपर्ने आवाज उठाउँदै आएका छन् । उसो त पटक पटक कांग्रेस सभापति एवं प्रधानमन्त्री शेरबहादुर देउवाले समेत अध्यक्ष ओलीलाई आफ्ना भित्रियाहरुमार्फत् सन्देशहरू आदान प्रदान गरिरहेकै छन् । उता एमालेले पनि माओवादीसहितको गठबन्धन तोडे कांग्रेसलाई सरकार गठनमा निःशर्त सहयोग गर्ने बताउँदै आएको छ ।

आफू प्रधानमन्त्री बन्न दौडधुप गरिरहेका प्रचण्डलाई फकाएर एमालेले आफ्नो कित्तामा ल्याउन छलफल र गोप्य प्रयासहरू जारी राखेको देखिन्छ । कांग्रेससँग मिलेर सरकारमा जाँदा आफू निर्णायक नबन्ने बुझेर अध्यक्ष प्रचण्डसमेत वाम सरकार निमार्णका लागि सकारात्मक रहेको बताइन्छ । यद्यपि नेकपा एकीकृत समाजवादीविना नै वाम एकताको प्रस्तावमा ओलीको अडानले कम्युनिष्ट सरकार गठनमा केही समस्या देखा परेको नेताहरू बताउँछन् ।

मंगलबार साँझ नेकपा माओवादी केन्द्रका महासचिव देव गुरुङ र एमाले अध्यक्ष ओलीबीच भेटवार्ता भएको छ । उक्त भेटवार्ताले एमाले र माओवादीबीच सरकार गठनका लागि सहकार्यको छलफल सुरु भएको भन्ने विश्लेषण थालिएको छ । तर, उक्त भेटवार्तामा सत्ता सहकार्यबारे कुनै कुरा नभएको महासचिव गुरुङले न्युज कारखानालाई बताए ।

उनले भने, ‘सरकार गठनका लागि अझै लामो प्रक्रिया बाँकी नै छ । हिजोको भेटमा सामान्य बधाई आदान प्रदान मात्रै भएको हो । सत्ता सहकार्यबारे कुनै छलफल भएको छैन ।’  शीर्ष तहका नेताहरुबीचको भेटलाई सामान्य बधाई ज्ञापनमा मात्र सीमित भन्न मिल्छ ? भन्ने न्युज कारखानाको प्रश्नमा कम्युनिष्टहरु भेटवार्ता गर्नु आपसमा मिल्ने कुरा गर्नु अनौठो विषय नभएको महासचिव गुरुङको प्रतिक्रिया छ। ओली र गुरुङ भेटलाई लिएर कांग्रेस सशंकित देखिएको बताइन्छ ।

‘हामीले भेट्दा कांग्रेस किन सशंकित बन्यो त्यो उहाँहरूलाई नै थाहा होला । उहाँहरूले पनि ओलीजीसँग भेटवार्ता गरिरहनु भएकै छ नि, यसलाई अरुले कसरी बुझ्ने ? यस्ता कुरा सामान्य हुन्,’ उनले भने ।

महासचिव गुरुङले सरकार गठनबारे नेपाली कांग्रेससँग कुनै ठोस सहमति नभइसकेको बताएका छन् । निर्वाचन अघिको गठबन्धनलाई अघि बढाउनेबारे दलहरू एकमत रहेको निष्कर्ष निकाल्दै यसअघि बैठक समेत बसिसकेका छन् । यद्यपि सरकार गठनबारे गठबन्धनबीच ठोस सहमति नहुँदा अन्यौलता देखिएको छ ।