माओवादीलाई काठमाण्डौंमा झट्का : अध्यक्षसहित ११ जनाले त्यागे पार्टी

काठमाडौंः माओवादी केन्द्रको काठमाडौँ महानगरपालिका १६ नम्बर वडा कमिटीका अध्यक्षसहित ११ जनाले पार्टी परित्यागको घोषणा गरेका छन् । वडा कमिटीका अध्यक्ष सुदन थापासहित ११ जनाले पार्टी परित्यागको घोषणा गरेका हुन् ।

देशको वर्तमान राजनीतिक परिस्थिति तथा पुराना दलहरूप्रति जनतामा बढ्दो निराशाको गम्भीर समीक्षा तथा विश्लेषण गर्दै वडा नम्बर १६ को पार्टी कमिटीको जिम्मेवारीबाट अलग भएको उनीहरूले जारी गरेको विज्ञप्तिमा उल्लेख छ । साथै काठमाडौँ महानगरपालिका वडा नं १६ को आसन्न उपनिर्वाचनमा उपयुक्त र सक्षम गैरदलीय स्वतन्त्र उम्मेदवारलाई सघाउने समेत विज्ञप्तिमा उल्लेख छ ।

पार्टी परित्याग गर्नेहरूमा महेन्द्र कुमार श्रेष्ठ , अनमोल राणा, सानु श्रेष्ठ, भरत श्रेष्ठ, ऋषिराम श्रेष्ठ, गज बहादुर बराल, उत्तर कुमार श्रेष्ठ र सुन माया तामाङलगायत रहेका छन् । स्वतन्त्र उम्मेदवारको रुपमा देवेन्द्र श्रेष्ठले उम्मेदवारी घोषणा गरेको र उनीहरूले श्रेष्ठलाई नै सहयोग गर्नेगरी पार्टी परित्याग गरेको बताइएको छ ।