पोखरापछि स्याङ्जा र पाल्पामा पनि राजन लम्सालको उम्मेदवारीलाई अभूतपूर्व समर्थन

काठमाडौं, जेठ १७ । लायन्स क्लब अन्तर्राष्ट्रियका भावी अन्तर्राष्ट्रिय डाइरेक्टर (ID) पदका उम्मेदवार लायन राजन लम्साललाई पोखरापछि स्याङ्जा र पाल्पाबाट पनि एकबद्ध समर्थन प्राप्त भएको छ। पश्चिम नेपालका विभिन्न जिल्लाका लायनहरूबाट आएको एकमत समर्थनले लम्सालको उम्मेदवारी अझ सुदृढ बनेको छ।

एक्काइसौँ शताब्दीका सचेत लायन सदस्यहरूले नेताको छनोट गर्दा योगदान र प्रेरणादायी क्षमतालाई मापदण्ड बनाउँछन् भन्ने सन्देश यस समर्थनबाट उजागर भएको छ।

लायन राजन लम्साल केवल पदका लागि होइन, बरु नेपाली लायन आन्दोलनको समग्र हितका लागि अन्तर्राष्ट्रिय मञ्चमा सशक्त प्रतिनिधित्व गर्न सक्षम व्यक्तित्वका रूपमा स्थापित भइरहेका छन्।

लम्सालले विगतमा क्लब, जिल्ला तथा मल्टिपल स्तरमा विभिन्न जिम्मेवारी कुशलतापूर्वक निर्वाह गर्दै आफ्नो नेतृत्व क्षमताको परिचय दिँदै आएका छन्। न्याय, समानता, संघर्ष र त्यागको प्रतीकका रूपमा चिनिने लम्सालले लायन नेतृत्वको मूल्य–मान्यतालाई व्यवहारमा उतार्दै आएका छन्।

उनको उम्मेदवारीले नेपालभरिका लायन्सहरूबीच अद्भुत एकताको सन्देश प्रवाह गरेको छ। पश्चिमदेखि पूर्वसम्म फैलिएको यो समर्थन लायन्स आन्दोलनमा सकारात्मक ऊर्जा सिर्जना गर्ने विश्वास गरिएको छ। यसै क्रममा स्याङ्जा र पाल्पाका लायनहरूबाट आएको “Unanimous” समर्थनले लम्सालको उम्मेदवारीलाई थप विश्वासिलो बनाएको छ।

लम्सालले आफूप्रति समर्थन जनाउने सबै लायन साथीप्रति आभार प्रकट गर्दै, प्रतियोगी उम्मेदवारहरूप्रति पनि उच्च सम्मान प्रकट गरेका छन्। उनले लायन आन्दोलनलाई थप सशक्त बनाउने दृढ अठोट व्यक्त गर्दै अन्तर्राष्ट्रिय स्तरमा नेपालको प्रभावकारी प्रतिनिधित्व गर्ने विश्वास दिलाएका छन्।

यस अभूतपूर्व समर्थनलाई लायन लम्सालको आगामी विजयी यात्राको प्रारम्भिक संकेतका रूपमा हेरिएको छ। नेपाली लायनहरूका साझा आकांक्षा बोकेका लम्सालले एकता, सेवा र नेतृत्वको समुच्चयमार्फत अन्तर्राष्ट्रिय स्तरमा नेपालको गौरव अभिवृद्धि गर्ने अपेक्षा गरिएको छ।