फुटबाट पार्टीलाई जोगाउन नेता तथा कार्यकर्तालाई झलनाथ खनालको आह्वान (विज्ञप्ती)

काठमाडौंः नेकपा एमालेका वरिष्ठ नेता एवं पूर्वप्रधानमन्त्री झलनाथ खनालले स्वास्थ्य उपचारका लागि भारतको नयाँ दिल्ली जानुअघि पार्टी एकताका लागि आह्वान गरेका छन् ।

नेता खनालले बुधबार मध्यान्ह एक वक्तव्य जारी गर्दै, ‘एकता सफलताको बाटो हो भने फुट विनासको । त्यसैले रिस, राग, अहंकार र बदलाभाव त्यागेर पार्टी वैधानिक प्रक्रियाअन्तर्गत यो पार्टी फुटबाट जोगाउन तथा एकताबद्ध पार्न म सबै नेता कार्यकर्ताहरुलाई विशेष आहृवान गर्न चाहन्छु,’ उनले भनेका छन् ।

देशको विथोलिएको वर्तमान राजनीतिक अवस्थाले आफूलाई चिन्तित बनाएको पनि खनालको भनाइ छ । फुट विनाशको बाटो भएकोले एकता गर्नुपर्ने उनको भनाइ छ। फुटबाट पार्टीलाई जोगाउन एकतावद्ध पार्न नेता तथा कार्यकर्तामा खनालले आह्वान गरेका छन्।

वक्तव्यमा भनिएको छ, ‘देशका प्रमुख दलहरु र तिनका नेताहरुबीचको अनावश्यक टकराव, महत्वकांक्षा र व्यक्तिगत इगो साध्ने कार्य यथाशीघ्र अन्त्य गरिनुपर्छ । सबै एकजुट भएर मुलुकका मुलभूत समस्याहरु हल गर्नु पर्दछ भन्ने कुरा म सबैलाई आग्रह गर्न चाहन्छु ।’

स्वास्थ्यमा समस्या देखिएपछि नेता खनाल सोमबार मात्रै थापाथलीस्थित नर्भिक अस्पतालमा भर्ना भएका थिए । खनाल एकपछि अर्को स्वास्थ्य समस्याका कारण आज भारत गएका छन्। उनले सफल उपचारपछि आफू स्वदेश फर्किने बताएका छन्।