विनियोजन विधेयकका सिद्धान्त र प्राथमिकतामाथिको छलफल सम्पन्न

काठमाडौंः प्रतिनिधिसभा र राष्ट्रियसभाको आजको बैठकमा आगामी आर्थिक वर्ष २०८१/०८२ का लागि विनियोजन विधेयकका सिद्धान्त र प्राथमिकतामाथिको छलफल सम्पन्न भएको छ ।

छलफलका क्रममा सांसदहरूले राखेका जिज्ञासाको जवाफ दिनुहुँदै अर्थमन्त्री वर्षमान पुनले समाजवाद उन्मुख अर्थतन्त्र र सामाजिक प्रणालीको विकासका लागि केही ठोस आधार तयार हुने गरी आगामी बजेट तयार हुने बताउनुभयो ।

अर्थमन्त्री पुनले निवर्तमान अर्थमन्त्री प्रकाशशरण महतले संसद्मा प्रस्तुत गर्नुभएको विनियोजन विधेयकका सिद्धान्त र प्राथमिकता परिवर्तन नगरे पनि त्यसमा सांसदहरूको सुझावलाई समेटेर लैजाने बताउनुभयो ।

अर्थमन्त्री पुनले आगामी बजेट १६ औँ योजनाको सोच अनुसारको पहिलो वर्षको प्रमुख कार्यहरू गर्ने वर्ष हुने र संविधानमा उल्लेख भए अनुसारको समाजवाद उन्मुख अर्थतन्त्र र सामाजिक प्रणालीको विकासका लागि केही ठोस आधार तयार हुने पनि बताउनुभयो ।

अर्थमन्त्री पुनले अर्थतन्त्रमा देखिएका समस्या र चुनौतीहरू समाधान गर्न सरकारको न्यूनतम साझा कार्यक्रम तथा साझा सङ्कल्पको कार्यान्वयनमा बजेट केन्द्रित रहने उल्लेख गर्नुहुँदै यसले शिथिल अर्थतन्त्रलाई नयाँ गति दिई मिटरव्याज र लघुवित्त क्षेत्रमा देखिएका समस्या पनि समाधान हुने विश्वास व्यक्त गर्नुभयो ।

अर्थमन्त्री पुनले उत्पादन, उपभोग, लगानी र व्यापार व्यापार क्षेत्रमा देखिएका समस्या समाधानका लागि नीतिगत सुधार गर्ने र निजी क्षेत्रलाई समेत विश्वासमा लिई आर्थिक क्रियाकलापलाई तीव्रता सरकार प्रतिबद्ध रहेको पनि बताउनुभयो ।

यसअघि, प्रतिनिधिसभा आजको बैठकमा प्रमुख प्रतिपक्षी दल नेपाली काँग्रेसले सहकारी प्रकरणबारे उपप्रधानमन्त्री तथा गृहमन्त्री रवि लामिछानेमाथि छानविन गर्नुपर्ने माग दोहोर्‍याएको थियो ।

बैठकको सुरुमा सांसद इशवारीदेवी न्यौपानेले सभामुख देवराज घिमिरेसँग समय माग गरी सहकारी ठगीका विषयमा संसदीय छानबिन समिति गठन गर्नुपर्ने माग दोहोर्‍याउनुभयो ।

यस्तै, बैठकमा सांसदहरुले देशका विभिन्न भागमा भइरहेको आगलागी र डढेलोबाट भइरहेको क्षतिबारे सरकारको ध्यानाकर्षण गराउँदै समयमा नै नियन्त्रणमा ध्यान दिन आग्रह गर्नुभयो ।

सांसदहरुले पछिल्लो समय बढिरहेको सडक दुर्घटना न्यनिकरण गर्न, घाइतेको उपचारमा प्रभावकारी व्यवस्था गर्न तथा पूर्वाधार निर्माणका योजनाहरू निर्धारित समयभित्र सम्पन्न गर्न पनि सरकारको ध्यानाकर्षण गराउनुभयो ।

यस्तै, राष्ट्रियसभाको आकस्मिक समयमा बोल्दै सांसदहरुले देशका विभिन्न स्थानमा भएका सडक दुर्घटनाका मृतकहरूलाई क्षतिपूर्ति र घाइतेहरूको तत्काल निःशुल्क उपचारको माग गर्नुभयो ।

सांसदहरुले बारम्बार यस्ता सडक दुर्घटना भइरहेको र मानिसको अकालमै ज्यान जाने अवस्थाको अन्त्य गर्न सरकार समयमै जोखिमपूर्ण सडक र सवारी साधनको अवस्थाको विषयमा गम्भीर हुनुपर्ने धारणा राख्नुभयो ।

सांसदहरुले साँघुरो सडक, ट्राफिक जनशक्तिको कमी, पार्किङको अभाव, पुलहरू पुराना र सवारी साधनहरूको जर्जर अवस्थाका कारण बारम्बार सडक दुर्घटना भइरहेको भन्दै सडक दुर्घटना न्यूनीकरणका लागि सरकारले तत्काल ठोस योजना बनाएर काम गर्नुपर्ने धारणा राख्नुभयो ।

प्रतिनिधिसभाको अर्को बैठक यही चैत्र १८ गते आइतबार बिहान ११ः०० बजे  र राष्ट्रियसभाको अर्को बैठक चैत्र १५ बिहीबार दिउँसो सवा १ः०० बजे बस्ने छ ।