प्रचण्ड-ओली दूरी बढ्दै

काठमाडौंः संसद्मा अर्थमन्त्री वर्षमान पुनले पेस गरेको बजेटलाई लिएर सत्तारूढ नेपाल कम्युनिस्ट पार्टी (एमाले) र नेपाल कम्युनिस्ट पार्टी (माओवादी केन्द्र)बीचको दूरी बढ्दै गएको छ । सत्तारूढ दलसँग छलफल नै नगरी बजेट ल्याएको भन्दै आलोचना गरेका एमाले अध्यक्ष केपी शर्मा ओलीले शनिबार पुनः कडा असन्तुष्टि पोखेका छन् ।

माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष ओलीबीच असमझदारी बढ्दै गएको स्रोतको भनाइ छ । सोही कारण बजेटलाई लिएर एमाले अध्यक्ष ओलीले पार्टीका सांसदलाई बजेटको विरोध गर्न निर्देशन दिएका छन् ।

शनिबार बसेको एमाले संसदीय दलको बैठकमा ओलीले सरकारले ल्याएको बजेटमाथि असन्तुष्टि पोख्दै यही अवस्थामा स्विकार्न नसकिने संकेत दिएका छन् । बजेटको विषयमा एक–दुई जनाको मुख हेरेर कसरी सन्तोष मान्ने भन्दै उनले प्रश्न उठाएका छन् ।

ओलीले १ दुई जनाको मुख हेरेर वा हामी सरकारमा छौं भनेर सन्तोष नमान्ने टिप्पणी गरेका छन् । ‘यो बजेटमा एक-दुई जनाको मुख हेरेर, अनि हामी सरकारमा छौं भन्दैमा अनि गरिबतिर देश गए पनि के भयो र ? हामी सरकारमा छँदै छौं भनेर हुन्छ ?’ ओलीले भने ।

आफूहरू सरकारमा हुनुको कारण देशलाई गरिबीबाट रोकेर विकासतर्फ अघि बढाउन लागिपरेको उनले स्पष्ट पारेका छन् । ‘त्यही चिज हुँदैन भने अनि सन्तोष कसरी मान्ने ? हामीले नै चलाइरहेको मन्त्रालयको कस्तो छ स्थिति ? त्यसमा कस्तो छ बजेटको विनियोजन ? त्यो पनि अलिकति हेर्नुपर्ने हुन्छ,’ उनले भने । बजेट’बारे खुलेर छलफल गर्न र धारणा राख्न पनि ओलीले सांसदलाई निर्देशन दिए ।राजधानी दैनिकबाट