नारायणी नदी किनारमा २ जनाकाे शव फेला, सिमलताल घटनाकै रहेकाे आशङ्का

काठमाडौंः नवलपरासी पूर्वको गैँडाकोट-१० मा दुई जनाको शव फेला परेको छ । नारायणी नदी किनारमा दुई शव फेला परेको प्रहरीले जानकारी दिएको छ ।

फेला परेका शव सिमलताल घटनाका रहेको अनुमान गरिएको छ। यद्यपि प्रहरीले पुष्टि गरेको छैन। सनाखत भएपछि पुष्टि गर्न सकिने प्रहरीले जनाएको छ।

चितवनको भरतपुर महानगरपालिका–२९ स्थित सिमलतालमा पहिरो खस्दा शुक्रबार दुई वटा डिलक्स गाडी त्रिशूलीमा खसेका थिए। एन्जल वीरगन्जबाट काठमाडौँतर्फ र गणपति काठमाडौँबाट रौतहटको गौरतर्फ जाँदै गरेको अवस्थामा पहिरोमा परेका थिए।

बेपत्ता बस र यात्रुको खोजी कार्य चलिरहेको छ। यसअघि एक जना भारतीय नागरिकको शव फेला परेको थियो। उक्त शव सोही घटनामा परेका बसमा सवार यात्रीको रहेको पुष्टि भइसकेको छ।