बुढानीलकण्ठ नगरपालिकाले एक सय युवालाई रोजगार दिने

काठमाडौं । बुढानीलकण्ठ नगरपालिकाले एक सय युवालाई रोजगार दिने तयारी गरेको छ । नगरपालिकामा पत्रकार भेटघाट कार्यक्रमको आयोजना गर्दै आगामी फागुन २ र ३ गते चौथो वृत्ति तथा रोजगार मेलामा युवालाई रोजगार दिने तयारी गरिएको जानकारी दिइएको छ ।

“शिक्षा, सीप र उत्पादकता हाम्रो प्राथमिकता” नारासहित हुन लागेको मेलामा युवा वर्गलाई रोजगारी तथा सीप विकासमा जोड दिने लक्ष्य राखिएको छ । मंगलवार पत्रकार सम्मलेन गर्दै नगरपालिकाले गतवर्ष सम्पन्न तेस्रो मेला, रोजगारी तथा युवा परामर्शमा केन्द्रित रहेकोमा यसपटक श्रमिक तथा उद्यमशीलता प्रवद्र्धनमा विशेष ध्यान दिइने जनाइएको छ ।

मेलामा कुल ४८ वटा स्टल रहनेछन्, जसमा १५ वटा रोजगारीका अवसर खुलाउने, ६ वटा श्रम स्वीकृतिसम्बन्धी जानकारी दिने र अन्य स्टलले उद्यमशीलता तथा डिजिटल प्रविधि सम्बन्धी सेवा तथा सूचना प्रदान गर्नेछन् । कम्तीमा माध्यामिक तह उत्तीर्ण गरेका एक सय जना युवाका लागि रोजगारी प्रवद्र्धनको विशेष अवसर मिलाइने र चार सय जनालाई व्यावसायिक सीपसम्बन्धी परामर्श दिइने नगरपालिकाको योजना रहेको छ ।

युवालाई स्वरोजगारको सम्भावना खोज्न प्रोत्साहित गर्न विभिन्न क्षेत्रका विज्ञसँग अन्तक्र्रिया गराउने कार्यक्रमसमेत रहेको नगरपालिकाले बताएको छ । नगरपालिकाले बेरोजगार युवाका लागि सूचनाको पहुँच विस्तार गर्दै रोजगारी सूचना केन्द्र सञ्चालनमा ल्याइसकेको छ । इच्छुक व्यक्तिले माघ २५ गतेभित्र नगरपालिकाको पेजमा उल्लेख भएको फारममा अनलाइन वा वडा कार्यालयमार्फत आवेदन दिन सक्नेछन् ।