एप्पलले चार वर्षमा अमेरिकामा पाँच खर्ब डलर लगानी गर्ने, २० हजार कर्मचारी भर्ती गर्ने

काठमाण्डौं । एप्पलले आगामी चार वर्षमा अमेरिकामा पाँच खर्ब डलरभन्दा बढी खर्च गर्ने र २० हजार कर्मचारी भर्ती गर्ने बताएको छ । राष्ट्रपति डोनाल्ड ट्रम्पले यस घोषणाको श्रेय तुरुन्तै लिनुभएको छ ।

सिलिकन भ्यालीमा आधारित यस दिग्गजले यो “अहिलेसम्मकै सबैभन्दा ठूलो खर्च प्रतिबद्धता’ भएको बताएको छ । यो प्रतिबद्धता प्रविधि कम्पनीहरू कृत्रिम बौद्धिकता (एआई) प्रविधि विकास गर्न प्रभुत्वका लागि लडिरहेका बेला आएको छ ।

अमेरिकी कम्पनीहरूलाई उत्पादन स्वदेश फर्काउन दबाब दिँदै आउनुभएका ट्रम्पले यस लगानीका लागि आफ्नो प्रशासनलाई धन्यवाद दिनुपर्ने दाबी गर्नुभयो ।

“यसको कारण, हामी जे गरिरहेका छौँ त्यसमा विश्वास छ, जुनबिना उनीहरूले दस सेन्ट पनि लगानी गर्दैनन् । धन्यवाद टिम कुक र एप्पल !!!”, ट्रम्पले आफ्नो ट्रुथ सोसल प्लेटफर्ममा ठूला अक्षरमा लेख्नुभएको थियो ।

एप्पलले आफ्नो २० हजार नयाँ भर्ती प्रायः अनुसन्धान र विकास, सिलिकन इन्जिनियरिङ, सफ्टवेयर विकास र एआई र मेसिन लर्निङमा केन्द्रित हुने बताएको छ ।

यसले सन् २०२६ मा टेक्सासको ह्युस्टनमा नयाँ उत्पादन सुविधा खोल्ने योजना घोषणा गरेको छ । यसले सर्भरहरू जोड्नेछ जसले ‘एप्पल इन्टेलिजेन्सलाई शक्ति प्रदान गर्न महत्त्वपूर्ण भूमिका खेल्छ’–कम्पनीको एआई उत्पादनहरूको हिस्सा– र ‘हजारौँ रोजगारी’ सिर्जना गर्नेछ ।

डेट्रोइटमा रहेको एउटा एप्पल म्यानुफ्याक्चरिङ एकेडेमी पनि ‘कम्पनीहरूलाई उन्नत उत्पादनमा रूपान्तरण गर्न मद्दत गर्ने’ योजनामा छ ।रासस

“हामी अमेरिकी नवप्रवर्तनको भविष्यप्रति आशावादी छौँ र हामी हाम्रो देशको भविष्यका लागि यो पाँच खर्ब डलरको प्रतिबद्धताका साथ हाम्रो दीर्घकालीन अमेरिकी लगानीहरूमा निर्माण गर्न गर्व गर्छौं”, एप्पलका सिइओ टिम कुकले एक विज्ञप्तिमा भन्नुभयो ।

एप्पलका आपूर्तिकर्ताहरूले पहिल्यै नै एरिजोना, कोलोराडो, ओरेगन र उटा सहित १२ राज्यका २४ कारखानामा सिलिकन उत्पादन गरिसकेका छन् । रासस