रसुवागढी नाका जोड्ने एक मात्र सडक अवरुद्ध

काठमाण्डाैंः वर्षासँगै आएको पहिरोले सडक भासिएपछि रसुवागढी नाका जोड्ने एक मात्र सडक अवरुद्ध भएको छ ।

बर्षायाम सुरु भएसँगै रसुवागढी नाका जोड्ने सडकखण्डको विभिन्न स्थानमा पहिरो गएपछि सडक अबरुद्द भएको हो । रसुवाको पासाङ ल्हामु सडक खण्ड अन्तर्गत धुन्चे–स्याफ्रुबेसी खण्डको भार्खु डाँडामा भासिएको सडक सञ्चालनमा ल्याउन सडक डिभिजन कार्यालय नुवाकोटले स्काभेटरको प्रयोग गरी काम सुरु गरेको छ ।

सडक डिभिजन कार्यालय नुवाकोटले भासिएको सडकमा कुनाबाट नयाँ ट्रयाक खोल्ने काम सुरु गरेको हो । करिब पचास मिटर सडक भासिएको क्षेत्रमा तार जालीको प्रयोग गरी ग्याभिन समेत लगाउनु पर्ने भएकाले दोहोरो आवत जावत गर्न करिब एक साता लाग्ने सडक डिभिजन कार्यालय नुवाकोटले जनाएको छ ।

यसैगरी रसुवागढी नाका जोड्ने छोटो दूरीको मैलुङ–स्याफ्रुबेंसी सडक पहिरोकै कारणअसारको अन्तिम साताबाट बन्द भएको छ । नाका जोड्ने सडक अवरुद्ध हुँदा अहिले नाकाबाट सामान लिएर गन्तव्यमा जान लागेका कन्टेनरहरु बिचमै रोकिएका छन ।