कोशी प्रदेश सभाबाट विधेयक पारित

विराटनगर । कोशी प्रदेश सभाको आजको बैठकले ‘केही प्रदेश ऐनलाई संशोधन गर्न बनेको अध्यादेश, २०८१ लाई प्रतिस्थापन गर्न बनेको विधेयक, २०८१’ सर्वसम्मतिले पारित गरेको छ ।

उक्त विधेयकमा संशोधनका प्रस्ताव प्रदेश सभा सचिवालयमा दर्ता नभएका र प्रदेश सभा सदस्यहरूले दफावार छलफलमा पनि भाग नलिएपछि आन्तरिक मामिला तथा कानुनमन्त्री रेवतीरमण भण्डारीले सो विधेयकलाई पारित गरियोस् भनी प्रस्ताव सदनमा पेस रेका थिए । उक्त प्रस्ताव सभामुख अम्बरबहादुर विष्टले निर्णयार्थ प्रस्तुत गर्दा सर्वसम्मतिले पारित भएको हो ।

यसअघि प्रदेश सभाको बैठकको विशेष समयमा प्रमुख प्रतिपक्ष दल नेपाल कम्युनिष्ट पार्टी (माओवादी केन्द्र) का संसदीय दलका नेता इन्द्रबहादुर आङ्बोले सरकारले सही ढंगले जनतालाई सेवा प्रवाह गर्न नसकेको आरोप लगाए ।

उनले संघीय सरकारले दिने अनुदानमा भारी रकम कटौती भएकामा प्रदेश सरकार आफ्ना अधिकार खोज्न असफल भएको उल्लेख गर्दै पुँजीगत र चालु खर्चको फेहरिस्त हेर्दा प्रदेश सरकार निकै कमजोर अवस्थामा देखिएको टिप्पणी गरे ।

नेता आङ्बोले राजनीतिक स्थिरता कायम गर्न, संविधान संशोधन गर्न र मुलुकको आर्थिक अवस्था सुधार गर्न बनेको दुई दलको गठबन्धन पनि आफ्ना काममा असफल भएको आरोप लगाउँदै मुलुकको अर्थ सङ्कुचन भएकाले नै वैदेशिक रोजगारीमा जानेको सङ्ख्या बढ्दै गएकामा चिन्ता व्यक्त गरे ।

विशेष समयमै नेपाल कम्युनिष्ट पार्टी (एमाले) संसदीय दलका प्रमुख सचेतक विदुरकुमार लिङ्थेपले २०५९ फागुन २४ गते सङ्खुवासभामा मालपोत, कृषि विकास बैंक र नापी शाखामा तत्कालीन विद्रोही माओवादीबाट गरिएको आगजनीका कारण बैंकमा धितोका रूपमा राखेको जनताका जग्गाका सबै प्रमाण जलेर खरानी भएको अवस्थामा अहिलेसम्म पनि पीडितले जग्गाको प्रमाणपत्र नपाउनु दुःखको कुरा भएको बताए ।

प्रमुख सचेतक लिङ्थेपले ३० हजार हेक्टर जग्गाभन्दा बढीका प्रमाणपत्र जलेर खरानी हुनु र २०७६ सालदेखि सुरु भएको नापीअनुसार छ हजार हेक्टर जग्गाको मात्र नाप नक्सा भएको कुरा प्रदेशसभा बैठकमा उठाए । पीडित परिवारलाई सक्दो चाँडो प्रमाण पुर्जा दिन उनले प्रदेश सरकारको ध्यानाकर्षण गराए ।

यस्तै प्रदेश सभाको शून्य समयमा प्रदेशसभा सदस्यहरू गणेशप्रसाद उप्रेती, मीना श्रेष्ठ, किशोरचन्द्र दुलाल, राधाकृष्ण खनाल, गीतादेवी रेग्मी, सुनिताकुमारी गुरुङ, प्रेमराज थाम्सुङ र होमबहादुर थापाले प्रदेशका जल्दाबल्दा विषयमा बोलेका थिए ।

कोशी प्रदेशसभाको अर्को बैठक यही फागुन २७ गते अपराह्न २ बजे बस्नेछ । र