जसपा सांसद प्रदिप यादव दुईसाता नपुग्दै कोरोनामुक्त

काठमाण्डौंः प्रतिनिधिसभाका सांसद प्रदीप यादव दुईसाता नपुग्दै कोरोनामुक्त भएका छन् । कोरोना परिक्षणको क्रममा पोजिटिभ देखिएपछि सेल्फ आइशोलेसनमा रहेका उनको पछिल्लो रिपोर्ट नेगेटिभ आएपछि कोरोनामुक्त भएका हुन् ।

वीरगञ्जको नारायण अस्पतालमा कोरोना परिक्षण गरेका उनले समाजिक संजालमार्फत कोरोनामुक्त भएको जानकारी दिएका हुन् । गत साउन १६ गते कोरोना पोजेटिभ देखिएपछि उनी घरमै होम आइसोलेसनमा बस्दै आएका थिए । जनता समाजवादी पार्टीका सांसद यादवले १२ दिनपछि कोरोनामुक्त भएको जनाकारी दिए ।

सामाजिक सञ्जालमा उनले लेखेका छन् ‘आज मैले १२ दिनपछि दोस्रो पटक पिसिआर जाँच गराउंदा कोरोना नेगेटिभ देखिएको जानकारी गराउन चाहन्छु,’ ‘वीरगन्जस्थित आफ्नो घरभित्र आइसोलेट भएर आत्मअनुशासन कायम गरी सुरक्षित रूपले बसी डाक्टरले दिएको सल्लाह सुझाव अनुसार चलेकोले कोरोनालाई जित्न सफल भएको छु ।’ नागरिकसित कुरा गर्दै उनले आफूले घरेलु उपचारमा जोड दिएकोले चाँडै कोरोनामुक्त भएको बताए ।

‘मलाई लाग्छ यसमा आहार र दैनिक रुटिनको बहुत भूमिका छ, जानकारहरुसंग परामर्श गरेर र इन्टरनेटमा उपलब्ध समग्रीहरु हेरेर पढेर मैले घरेलु उपचारलाई अपनाएको थिएँ’ सांसद यादवले भने, ‘ एलोप्याथिक औषधिको नाममा २ चक्की पारासिटामोल मात्र पहिलो दिन खाएको छुँ ।’ गत साउन १६ गतेको रिपोर्टमा सांसद यादवमा कोरोना संक्रमण पुष्टि भएको थियो । त्यसपछि उनी वीरगन्ज १३ राधेमाइस्थित आफ्नो घरभित्रै सेल्फ आइसोलेसनमा बसेका थिए । संक्रमितहरुको सुरक्षा नियम अनुसार र डाक्टर को सल्लाह र निर्देशन  बमोजिम अझपनि एक हप्ता आइसोलेट भएर बस्ने उनले बताए ।