तीनकुने घटनामा थप ६ जना पक्राउ

काठमाडौँ । तीनकुनेमा भएको राजावादी प्रदर्शनमा तोडफोड र आगजनी गरेको आरोपमा थप ६ जनालाई प्रहरीले पक्राउ गरेको छ ।

जिल्ला प्रहरी परिसर काठमाडौँको टोलीले थप ६ जनालाई पक्राउ गरेर सार्वजनिक गरेको हो । पक्राउ पर्नेहरूमा सर्लाहीका २२ वर्षीय अमित साह, सुनसरीका १९ वर्षीय सुमन कार्की, बर्दियाका ३४ वर्षीय हेमराज थारु, धादिङका २७ वर्षीय दिवस बोगटी क्षेत्री, काभ्रेकी ३० वर्षीया अनिता कुँवर (एनी) र सिन्धुपाल्चोकका ३० वर्षीय कुमार तामाङ छन् ।

उनीहरू आपराधिक उपद्रव र संगठित अपराधको कसुरमा काठमाडौँ जिल्ला अदालतबाट तीन दिनको म्याद लिएर अनुसन्धान अघि बढाइएको परिसरका प्रवक्ता तथा एसपी अपिल राज बोहराले बताए ।

योसँगै राजावादी आन्दोलनका उत्रिएकाहरूको पक्राउ पर्ने संख्या ७३ पुगेको छ । चैत १५ गते दुर्गा प्रसाईँको आह्वानमा राजसंस्था पुनर्स्थापनाका लागि भन्दै तीनकुनेमा भएको प्रदर्शनमा दुई जनाको मृत्यु भएको थियो।