राष्ट्रपति पौडेलसँग अजरबैजानका उप-विदेशमन्त्रीको शिष्टाचार भेटवार्ता

काठमाडौँ, वैशाख १९ ।  राष्ट्रपति रामचन्द्र पौडेलसँग अजरबैजानका उप–विदेशमन्त्री एलनुर मामेडोभले शिष्टाचार भेट गरेका छन्। आज राष्ट्रपति भवन शीतल निवासमा भएको भेटवार्तामा दुई देशबीचको सम्बन्ध सुदृढ बनाउने विषयमा विशेष चर्चा भएको थियो।

राष्ट्रपति पौडेलले अजरबैजानसँगको सम्बन्धमा हालै आएको सकारात्मक प्रगतिप्रति खुसी व्यक्त गर्दै आपसी सहकार्यलाई अझ मजबुत बनाउने दिशामा अगाडि बढ्नुपर्नेमा जोड दिए। उनले वातावरणसम्बन्धी विश्व सम्मेलन कोप–२९ (COP-29) मा अजरबैजान भ्रमणको स्मरण गर्दै उक्त भ्रमणले दुई देशबीचको सम्बन्धलाई नयाँ उचाइमा पु-याउने विश्वास व्यक्त गरे।

उप–विदेशमन्त्री मामेडोभले राष्ट्रपति पौडेलको अजरबैजान भ्रमणले द्विपक्षीय सम्बन्धमा नयाँ आयाम थपेको उल्लेख गरे। उनले विगत ३० वर्षको अन्तरालमा कुनै औपचारिक समझदारी पत्रमा हस्ताक्षर नभएको तथ्य उल्लेख गर्दै अब चाँडै कुनै न कुनै समझदारीपत्र (MoU) मा हस्ताक्षर हुने गरी तयारी भइरहेको जानकारी दिए।

भेटवार्तामा दुवै पक्षले व्यापार, पर्यटन, जलवायु परिवर्तन तथा अन्य सम्भावित क्षेत्रमा सहकार्य विस्तार गर्ने अवसरहरू पहिचान गर्दै आगामी दिनमा दुवै देशबीचको सम्बन्धलाई अझ घनिष्ट बनाउने प्रतिबद्धता जनाएका थिए।