पूर्वराजा ज्ञानेन्द्रलाई तुरुन्तै गिरफ्तार गर्न माओवादी सांसद सुनारको माग

काठमाडौं । नेकपा माओवादी केन्द्रका सांसद भुवनबहादुर सुनारले पूर्वराजा ज्ञानेन्द्र शाहलाई तुरुन्तै गिरफ्तार गर्न माग गरेका छन्।

राष्ट्रिय सभाको आइतबारको बैठकको शून्य समयमा बोल्दै सांसद सुनारले चैत १५ गते तीनकुनेमा भएको हिंसात्मक प्रदर्शनको योजना बनाउनेमा पूर्वराजा शाहको संलग्नता रहेको आरोप लगाए।

“चैत १५ गते तीनकुनेमा उत्पात मच्चाउने घटनाको माइक्रो म्यानेजमेन्ट मिलाउने ज्ञानेन्द्र शाहलाई तुरुन्त गिरफ्तार गर्नुपर्ने थियो,” सुनारले भने, “सरकार अहिलेसम्म के हेरेर बसेको छ? सरकारले किन ढिलासुस्ती गरेको हो?”

उनले पूर्वराजालाई कारबाहीको दायरामा ल्याउन सरकारसँग आग्रह गरे।

गत १५ चैतमा राजतन्त्र पक्षधरहरूले “निर्णायक आन्दोलन” भन्दै तीनकुनेमा प्रदर्शन गरेका थिए। हिंसात्मक मोड लिएको सो प्रदर्शनमा दुई जनाको मृत्यु भएको थियो।