नागार्जुनका मेयर बस्नेत सम्पत्ति शुद्धीकरण मुद्दामा दोषी ठहर

काठमाडौं, असार ६ गते । काठमाडौंको नागार्जुन नगरपालिकाका प्रमुख मोहनबहादुर बस्नेतलाई विशेष अदालतले सम्पत्ति शुद्धीकरण मुद्दामा दोषी ठहर गरेको छ। विशेष अदालतका अध्यक्ष एकनारायण कुँवर र सदस्य न्यायाधीश रामबहादुर थापाको संयुक्त इजलासले उनलाई दोषी ठहर गर्दै सजाय निर्धारणका लागि असार १६ गते पेशी तोकेको हो।

बस्नेतले पदमा कोलोनी प्रालि, पदमा मर्चेन्ट कम्पनी प्रालि तथा ती कम्पनीका सञ्चालक अध्यक्ष राजुप्रसाद कँडेलबाट ९ करोड २२ लाख ४६ हजार ३२ रुपैयाँ घुस लिएको पुष्टि अदालतले गरेको छ। सो रकमको प्रयोग गरेर उनले आफ्नो नाममा जग्गा किनमेल, कित्ताकाट र हक हस्तान्तरण गरी करिब १३ करोड १२ लाख ७३ हजार ३२ रुपैयाँ बराबरको सम्पत्ति शुद्धीकरण गरेको ठहर अदालतले गरेको छ।

अदालतले बस्नेतले सम्पत्ति शुद्धीकरण निवारण ऐन, २०६४ को दफा ३ को उपदफा १ को खण्ड क, ख र ग बमोजिम बर्जित कार्य गरेको पुष्टि गर्दै सोही ऐनको दफा ३ को उपदफा ३ अनुसारको कसुरमा दोषी ठहर गरेको हो।

यसै मुद्दामा उनीसँगै समावेश भएकी श्रीमती उर्मिला बस्नेत भने दोषमुक्त भएकी छन्। अदालतले उनीमाथि घुस लिने वा सो रकममा संलग्न भएको ठोस प्रमाण नपुगेको भन्दै सफाइ दिएको हो।

त्यस्तै पदमा कोलोनी प्रालि, पदमा मर्चेन्ट कम्पनी प्रालि तथा ती कम्पनीका सञ्चालक अध्यक्ष कँडेलमाथिको सम्पत्ति शुद्धीकरण सम्बन्धी अभियोग पनि प्रमाण अभावका कारण फिर्ता गरिएको छ। उनीहरूमाथि घुस दिएको पुष्टि भए पनि त्यसपछि सम्पत्ति शुद्धीकरणको प्रक्रियामा संलग्न भएको देखिएन भन्ने ठहर अदालतले गरेको हो।

अब बस्नेतलाई सम्पत्ति शुद्धीकरण र घुस लिएको दुवै अभियोगमा अदालतले के सजाय सुनाउनेछ भन्ने टुंगो असार १६ गते लाग्नेछ। दोषी ठहर भएका सार्वजनिक पदधारीमाथि कडा कारबाही हुने अपेक्षा गरिएको छ।