प्रहरी निरीक्षकसहित थप ५० जनामा कोरोना संक्रमण पुष्टि

काठमाण्डौंः नारायणी अस्पतालको प्रयोगशालामा गएराति गरिएको परीक्षणमा एक प्रहरी निरीक्षकसहित थप ५० जनामा कोरोना संक्रमण पुष्टि भएको छ । अस्पतालका प्रवक्ता डा.अतुलेश चौरसियाका अनुसार ४ सय ४३ जनाको स्वाब परीक्षण गर्दा ५० जनामा कोरोना संक्रमण पुष्टि भएको हो ।

संक्रमितमध्ये ३१ जना पर्साका, ८ जना बारा, ४ जना धनुषा, ३ जना महोत्तरी, दुई जना सर्लाही, एक/एक जना काठमाडौं र रौतहटका रहेको चौरासियाले बताउनु भयो । संक्रमितहरु १५ वर्षदेखि ५६ वर्ष उमेर समूहका रहेका छन् । संक्रमितमध्ये १० जना कन्ट्याक्ट ट्रेसिङमा परेकाहरु रहेको प्रयोगशालाले जनाएको छ ।

यस्तै वीरगन्जको एक निजी अस्पतलामा कार्यरत थप एक चिकित्सकमा पनि कोरोना देखिएको छ । पर्साको पोखरिया नगरपालिका–३ मा ६ जना र वडा ४ मा चारजना कोरोना संक्रमण पुष्टि भएको छ । कालिकामाई गाउँपालिकाको भेडियारीमामा ३ जना संक्रमित थपिएका छन् ।

वीरगन्ज महानगरपालिका–१४ पिप्रामा थप तीन जनामा कोरोना संक्रमण देखिएको छ । वीरगन्जको मुर्ली, नगवा, भिस्वा, विर्तामा पनि संक्रमित थपिएको अस्पतालले जनाएको छ ।