नयाँ तीन दल दर्ता, २० प्रक्रियामै

काठमाण्डौं । निर्वाचन आयोगमा १ सय २७ वटा दल दर्ता भएका छन्। त्यस्तै २० वटा दल दर्ता प्रक्रियामा छन्। दल दर्ताका लागि आयोगले यही कात्तिक मसान्तसम्मको समय दिएको छ।

आयोगका सहायक प्रवक्ता प्रकाश न्यौपानले १ सय २७ वटा दल दर्ता भइसकेको र २० दल दल प्रक्रियामा रहेको जानकारी शनिबार साँझ दिए। ‘दर्ताका लागि आयोगमा निवेदन दिएका २० वटा दलले पेस गरेका कागजपत्रमाथि छानबिन भइरहेको छ,’ उनले भने, ‘छानबिनपछि प्रक्रिया पूरा गरेकालाई राजनीतिक पार्टीको रूपमा प्रमाणपत्र दिने छौं।’

जेनजी आन्दोलनपछि दल दर्ताका लागि आयोगमा परेका निवेदनमध्ये हर्कराज राई नेतृत्वको ‘श्रम संस्कृति पार्टी’, पुष्पकमल दाहाल संयोजक रहेको ‘नेपाली कम्युनिस्ट पार्टी’ र वीरेन्द्र बस्नेत नेतृत्वको ‘गतिशील लोकतान्त्रिक पार्टी’लाई आयोगले मान्यता दिएको छ। यसअघि आयोगबाट एक सय २४ वटाले राजनीतिक दलको मान्यता पाइसकेका थिए।

आयोगका अनुसार दल दर्ता नियमित प्रक्रिया हो। आयोगले मान्यता पाएका दललाई फागुन २१ गते हुने प्रतिनिधिसभा सदस्य निर्वाचन प्रयोजनका लागि मंसिर १ देखि १० सम्म निवेदन दिन आह्वान गर्दै सार्वजनिक सूचना जारी गरिसकेको छ। आयोगका अनुसार मंसिर १० पछि बल्ल फागुनमा हुने निर्वाचनमा कति दल सहभागी हुन्छन् भन्ने यकिन हुने छ।

दुई लाख ८१ हजार नयाँ मतदाता

फागुन २१ को निर्वाचन प्रयोजनका लागि शुक्रबारसम्म २ लाख ८१ हजार नयाँ मतदाता थपिएका छन्। आयोगका अनुसार २०६४ फागुन २० गतेसम्म जन्मिएका नेपाली नागरिकले फागुन २१ को निर्वाचनमा मतदान गर्न सक्नेछन्। आयोगले अनलाइनबाट मतदाता नामावलीमा नाम दर्ता गराउन सकिने व्यवस्था मिलाएको छ। आयोगले मतदाता नामावलीमा नाम लेखाउने म्याद पाँच दिन बढाएर मंसिर ५ गतेसम्म पुर्‍याएको छ। थपिएको अवधिमा मतदाताको संख्या अझै थपिने छ। यसअघि कात्तिक मसान्तसम्मको म्याद दिइएको थियो। २०७९ सालको प्रतिनिधिसभा सदस्य निर्वाचनमा एक करोड ८० लाख मतदाता थिए। नागरिक