नेपालमा कोरोना संक्रमणबाट मृत्यु हुनेको संख्या ३९० पुग्यो, एकैदिन २ हजार २० जनामा कोरोना संक्रमण पुष्टि

काठमाडौंः नेपालमा कोरोना भाइरस संक्रमणबाट मृत्यु हुनेको संख्या ३९० पुगेको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा थप ७ जनाको मृत्यु भएसंगै मृतकको संख्या ३९० पुगेको हो । पछिल्लो २४ घण्टामा नेपालमा थप २ हजार २० जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयको नियमित मिडिया ब्रिफिङमा मन्त्रालयका प्रवक्ता प्रा डा जागेश्वर गौतमले देशभरका बिभिन्न प्रयोगशालामा ११ हजार ४५८ जनामा पीसीआर परिक्षण गर्दा २ हजार २० जनामा कोरोना संक्रमण पुष्टि भएको जानकारि दिए ।

यो सँगै नेपालमा कुल संक्रमितको संख्या ६१ हजार ५९३ पुगेको छ । आज सक्रिय संक्रमितको संख्या १७ हजार ३८३ रहेको प्रवक्ता गौतमले जानकारि दिए ।

यस्तै थप ८७१ जना कोरोना संक्रमितहरु डिस्चार्ज भएका छन् । नेपालमा कोरोना संक्रमणबाट मुक्त भइ घर फर्किनेको संख्या ४३ हजार ८२० पुगेको छ । यो संख्या कुल संक्रमितको ७१ दशमलव १ प्रतिशत हो ।