उदयपुरको त्रिवेणी धाममा आजबाट धार्मिक मेला सुरु

काठमाण्डौंः उदयपुरको कटारीस्थित कमला नदीमा अवस्थित त्रिवेणी धाममा यसवर्ष पनि आजदेखि १५ दिने माघे सङ्क्रान्ति मेला सुरु भएको छ ।

प्रदेश नम्बर १ कै महत्वपूर्ण त्रिवेणी धार्मिकस्थलको रुपमा रहेको सो मेला कोभिड–१९ को जोखिमका कारण विगतका वर्षजस्तै विभिन्न तामझाम गरेर सञ्चालन नगरिएको कटारी नगरपालिकाले जनाएको छ ।

नगरपालिकाका अनुसार यसपटक सञ्चालन गरिएको मेलामा विगतका वर्ष जस्तो विभिन्न सर्कस, पिङ, रमाइलो खेलकूद सञ्चालन नगरिएको तर दर्शन गर्न आउने भक्तजनका लागि खाना र नास्ताका सामान्य होटल स्थापना गरिएको छ । त्रिवेणीमा दर्शन गर्न र मकर नुहाउन तथा पूजा आरधना गर्नका लागि मात्र धार्मिक मेला सञ्चालन गरिएको कटारी नगरपालिकाका प्रमुख ज्ञानेन्द्रकुमार श्रेष्ठले बताए ।

बिहीबार बिहानैदेखि स्थानीय कटारी, सिन्धुली क्षेत्रका झण्डै पाँच हजार भक्तजनले त्रिवेणी धाममा मकर नुहाएर पूजा तथा आरधना गरिसकेको मेला आयोजक समितिका सदस्य केदार धमलाले जानकारी दिए ।

विगतका वर्षमा त्रिवेणी धाममा दर्शन गर्नका लागि प्रदेश नम्बर १ का झापा, मोरङ, सुनसरी, उदयपुर, प्रदेश नम्बर २ का सप्तरी, सिरहा, धनुषा, सर्लाही, महोत्तरी, प्रदेश नम्बर ३ का मकवानपुर, सिन्धुली काभ्रेपलाञ्चोक, रामेछाप, काठमाडौंसहित भारतका पश्चिम बंगालको दार्जीलिङ, सिक्किम र बिहार प्रदेशबाटसमेत ठूलो सङ्ख्यामा भक्तजन आउने गरेको मेला आयोजक समितिले जनाएको छ ।

विगतका वर्षमा यस मेलामा सात लाखदेखि दश लाखसम्म भक्तजन दर्शन गर्न आउने गरेको भएपनि यस वर्ष कोभिड–१९ जोखिमका कारण करिब पाँच लाख भक्तजन आउने अनुमान गरिएको समितिले जनाएको छ ।