मुख्यमन्त्री शेरधन विरूद्ध प्रदेशसभा बैठकमा अविश्वासको प्रस्ताव पेश

काठमाण्डौंः प्रदेश नम्बर १ का मुख्यमन्त्री शेरधन राईविरूद्ध प्रदेशसभा बैठकमा अविश्वासको प्रस्ताव पेश भएको छ । आज अबेर गरि बसेको प्रदेश सभा बैठकमा इन्द्रबहादुर आङ्बोले मुख्यमन्त्री राईविरूद्ध ३३ जना सांसदको हस्ताक्षर सहित अविश्वासको प्रस्ताव पेश गरेका हुन् ।

अविश्वास प्रस्ताव पेश हुनेवित्तिकै सभामुख भण्डारीले फागुन २० गतेसम्मका लागि बैठक स्थगित गरेका छन् ।

आइतबार बैठकअघि मुख्यमन्त्री शेरधन राईले सभामुखलाई पत्र पठाएर अविश्वासको प्रस्तावलाई कार्यसूचीमा नराख्न र बैठक स्थगित गर्न दबाव दिएपनि सभामुख प्रदीपकुमार भण्डारीले ढिलो गरि भए पनि बैठक राखेका थिए ।

मुख्यमन्त्री राईले दाहाल पक्षका १६ सांसदलाई ३ महिना निलम्बन गरेको भन्दै सरकार पक्षका सांसदले सदन सुरु हुनुभन्दा अगाडि उनीहरुलाई उपस्थित नगराउन सभामुख प्रदीपकुमार भण्डारीलाई आग्रह गरेका थिए ।

९३ सदस्यीय प्रदेशसभामा नेकपाका ६७, कांग्रेसका २१, जनता समाजवादी पार्टीका ३, राष्ट्रिय प्रजातन्त्र पार्टी र संघीय लोकतान्त्रिक राष्ट्रिय मञ्चका १/१ जना छन् । नेकपाका ६७ जनामध्ये पूर्वएमालेका ५१ र पूर्वमाओवादीका १६ जना छन् ।