ओली गौतमबीच बालुवाटारमा दुईघण्टा वान टु वान्

काठमाडौंः प्रधानमन्त्री केपी शर्मा ओलीले पार्टीबाट निष्काशन गरे पश्चात बालुवाटार नजाने घोषणा गरेका नेता बामदेब गौतम आज प्रधानमन्त्री ओलीसँग दुईघण्टा भेटेर भैंसेपाटी फर्किएका छन् ।

एमाले विभाजनमा ओली- नेपाल कतै नलाग्ने र पार्टी एकता राष्ट्रिय अभियान चलाउने उदघोष गरेका नेता गौतम बिहिबार साँझ ५ बजे सुटुक्क बालुवाटार पसेर गोप्य रुपमा प्रधानमन्त्री केपी ओलीसँग भेटवार्ता गरेका हुन् । उनले त्यहाँ प्रधानमन्त्री ओलीसँग झण्डै दुई घण्टा लामो सम्वाद गरेर फर्किएको बालुवाटार स्रोतले जनाएको छ ।

नेकपा एमाले विभाजन देशका लागि अहिले आवश्यक नरहेको र पार्टी विभाजनमा ओली र नेपाल दुवै बराबरी दोषी रहेको भन्दै गौतम पछिल्लो समय कुनै पनि पक्षमा लागेका छैनन् । तर उनका गतिविधि भने एकता राष्ट्रिय अभियानका नाममा संगठन निर्माण प्रयास गर्ने र त्यसैको बलमा बार्गेनिङ गर्ने देखिन थालेको छ ।

एकातिर केन्द्रीय समन्वय समिति घोषणा गर्ने र त्यो नेताहरुलाई सर्कुलर हुन नपाउँदै प्रधानमन्त्री ओली भेट्न बालुवाटार जाने कदमले उनको भूमिका रहस्यमय बनाईदिएको छ ।

प्रधानमन्त्रीको भूमिकाप्रति असन्तुष्ट रहेका गौतमलाई बालुवाटारले एकाएक निम्तो दिएर भेटवार्ता गर्नुलाई अर्थपूर्ण रुपमा हेरिएको छ । भेटमा भएका छलफलका विषय गोप्य राखिएका छन् । दुवै पक्षले भेट भएको पुष्टि गरेपनि भेटमा भएका कुराकानीका बारेमा केही खुलाएका छैनन्।

गौतमलाई आफुतिर आउन, आफुपछिको नेता बन्न र सरकारमा रोजेको मन्त्रालय लिन ओलीले अफर गरिरहेका छन् । आजको सम्वादमा पनि गौतमलाई चुनावी सरकारमा सहभागी भएर सँगै हिड्न आफु तयार रहेको जानकारी गौतमलाई ओलीले गराएको स्रोतहरुको दाबी छ ।