विपन्न नागरिकको उपचार निःशुल्क गर्न काँग्रेस महामन्त्री खड्काको माग

काठमाण्डौंः नेपाली काँग्रेसका महामन्त्री पूर्णबहादुर खड्काले विपन्न नागरिकको सबै प्रकारको उपचार निःशुल्क गर्न कर्णाली प्रदेश सरकारसँग माग गरेका छन्।

कोभिड–१९ (कोरोना भाइरस) को महामारीमा नागरिकको जीवन रक्षालाई पहिलो प्राथमिकता दिनुपर्ने भन्दै उनले सरकारको जुनसुकै कोषमा रहेको रकम नागरिकको जीवन रक्षाका लागि खर्च गर्नुपर्ने बताएका हुन्।

‘कर्णाली प्रदेशका कोरोना प्रभावित जिल्लाका सबै स्थानमा तत्काल पीसीआर परीक्षणलाई अभियानका रुपमा तीव्रता दिई कन्ट्रयाक्ट ट्रेसिङलाई व्यापक बनाइयोस्,’ उनले भने, ‘अक्सिजन, भेन्टिलेटर र आवश्यक औषधिको अभाव हुन नदिन सबै प्रकार पहुँचको प्रयोग गरियोस्।’

प्रदेश  र जिल्ला अस्पतालहरुमा पर्याप्त बेडहरुको प्रबन्ध गर्न थप काम गर्नुपर्ने भन्दै उनले विपन्न नागरिकहरुको सबै प्रकारको उपचार प्रदेश सरकारले निःशुल्क व्यवस्था गर्नुपर्ने माग राखे। दिनरात नभनी बिरामीको जीवन रक्षा गर्न आफ्नो जीवनलाई खतरामा राखी अहोरात्र खटिरहेका चिकित्सक र स्वास्थ्यकर्मीलाई उत्प्रेरित गर्ने अन्य वातावरण निर्माणका साथै प्रदेश सरकारका तर्फबाट यथेष्ट अतिरिक्त आर्थिक सुविधा उपलब्ध तत्काल गराउनु पर्ने उनको भनाइ छ।