एकताविरोधी अभिव्यक्ति नदिने एमाले गठित कार्यदलको निर्णय (पूर्णपाठ)

काठमाडौंः सत्तारुढ नेकपा एमालेको विवाद समाधानका लागि गठित कार्यदलको पहिलो बैठकले विवाद समाधान सम्बन्धी कार्यविधि र आचार संहिता बनाउने निर्णय गरेको छ। सिंहदरवारमा बसेको बैठकले कार्यविधि र संहिता तयार पार्ने निर्णय गरेको कार्यदलमा रहेका नेता भीम रावलले जानकारी दिए ।

उनले पार्टीलाई एकताबद्धरुपमा अघि बढाउन सद्भाव तथा एकता वृद्धि गर्न, आपसी अविश्वास, अन्तरविरोध र असहयोगबाट अलग रहन सम्पूर्ण पार्टी पङ्तिलाई आव्हान गर्ने निर्णय पनि भएको बताए। ‘आचार संहिता र कार्यविधि तुरुन्त तयार पारी लागू गर्ने । एक आपसमा अविश्वास, असहयोग हुने क्रियाकलाप नगर्न पनि बैठक हार्दिक आग्रह गर्दछ छ,’ रावलले भने।

बैठकमा ओली पक्षका नेताहरु शंकर पोखरेल र विष्णु पौडेल अनुपस्थित रहेका थिए। कार्यदलको बैठक भोलि फेरि बस्ने छ। कार्यदलललाई एमालेको सांगठनिक संरचना २०७५ जेठ ३ (माओवादी केन्द्रसँगको एकतापूर्व)को अवस्था, सहमतिमा जिम्मेवारी बाँडफाँट तथा माओवादीबाट प्रवेश गरेका नेताकार्यकर्ताको व्यवस्थापन लगायतबारे सुझाव दिन भनिएको छ।

गत फागुन २३ गते सर्वोच्च अदालतको फैसलापछि एमालेको पुरानै संरचना कायम हुनुपर्ने नेता नेपाल पक्षको अडान रहँदै आएको छ।