महामारीको चुनाव खारेज गर्न २२ दलको माग (विज्ञप्ती सहित)

काठमाडौंः सीपी गजुरेल नेतृत्वको देशभक्त गणतान्त्रिक मोर्चा सहित साना २२ राजनीतिक दलले कोरोना महामारीले जनता आक्रान्त भैरहेको समयमा षड्यन्त्रपूर्वक संसदीय निर्वाचनको मिति घोषणा गरिएको बताएका छन् ।

जनताले अहिले चुनाव नचाहेको भन्दै २२ दलले त्यसलाई तत्काल खारेज गर्न माग समेत गरेका छन् । २२ दलीय मोर्चाका तर्फबाट सिपी गजुरेलले सोमवार जारी गर्नुभएको अपीलमा अहिलेको मुख्य प्राथमिकता जनताको जीवन रक्षा भएको उल्लेख गर्नुभएको छ ।

‘विश्व स्वास्थ्य सङ्गठन र स्वास्थ विशेषज्ञहरुले आगामी मंसिर र पुसमा कोरोना महामारीको तेस्रो लहर आउन सक्ने र त्यो अहिलेको भन्दा पनि बढी क्षति पुर्‍याउने किसिमको हुने चेतावनी दिएकै समयमा कथित संसदीय निर्वाचनको मिति तोकिनुले यसपछाडि ठूलो षड्यन्त्र लुकेको छ भन्ने बुझ्न सकिन्छ । ’ अपीलमा भनिएको छ ।

उनीहरूले राष्ट्रपतिले गरेको निर्णय खारेज गर्न माग गरेका छन्। विदेशी शक्तिहरुले नेपालको राष्ट्रिय सार्वभौमिकतामाथि आँच आउने गतिविधि गरिरहेको दावी गर्दै अपीलमा देशभक्त र प्रगतिशील शक्तिलाई एकजुट हुन आह्वान गरिएको छ।