मध्य भोटेकोशी जलविद्युत् कम्पनीले भोलीदेखि आईपीओ निष्कासन गर्ने

काठमाण्डौः मध्य भोटेकोशी जलविद्युत् कम्पनी लिमिटेडले मंगलवारदेखि आयोजना प्रभावित र सिन्धुपाल्चोक जिल्लाका अन्य क्षेत्रका बासिन्दाको लागि आईपीओ विक्री पुन : खुला गर्ने भएको छ।

गत वैशाख १४ गते विक्री बन्द गरिएकोमा मंगलवारदेखि पुन : विक्री खुल्ला गरिएको कम्पनीले बताएको छ । कम्पनीले गत वैशाख ५ गते नेपाल धितोपत्र बोर्डबाट कुल १ करोड ५० लाख कित्ता आईपीओ निष्कासनको अनुमति पाएको थियो। सोहीअनुसार पहिलो चरणमा कम्पनीले प्रतिशेयर १०० रुपैयाँ अंकित दरको कुल ६० लाख कित्ता साधारण शेयर निष्कासन गर्न लागेको हो।

निष्कासन गरिने कुल कित्तामध्ये ३० प्रतिशत अर्थात् १८ लाख कित्ता आयोजना प्रभावित क्षेत्र सिन्धुपाल्चोक जिल्लाको भोटेकोशी गाँउपालिका वडा नं १ र ५, बाह्रबिसे नगरपालिका वडा नं ५ र ६ तथा बाह्रबिसे नगरपालिका वडा नं ७ र ८ मा स्थायी बसोबास गर्ने बासिन्दाहरुका लागि छुट्याइएको छ। बाँकी ७० प्रतिशत अर्थात् ४२ लाख कित्तामा सिन्धुपाल्चोक जिल्लाको अन्य क्षेत्रमा बसोबास गर्ने बासिन्दाहरुले आवेदन दिन पाउनेछन्।

आईपीओ साउन १७ गतेसम्म र ढिलोमा साउन ३२ गतेसम्म विक्री हुने छ । कम्पनीको आईपीओमा न्यूनतम ५० कित्ता र अधिकतम ४०० कित्तासम्मको लागि आवेदन दिन पाइनेछ । निष्कासन तथा विक्री प्रबन्धकमा ग्लोबल आइएमई क्यापिटल रहेको छ । आर्थिक अभियान