मैलुङ खोला जलविद्युत् कम्पनीको आईपीओ खुलेको दुई दिनमै साँढे ११ लाखभन्दा बढीको आवेदन

काठमाडौंः मैलुङ खोला जलविद्युत् कम्पनीको आईपीओमा दोस्रो दिनसम्ममा साढे ११ लाखभन्दा बढीले आवेदन दिएका छन्।

विक्री प्रबन्धक सिद्धार्थ क्यापिटल लिमिटेडका अनुसार शुक्रवार साँझ ५ बजेसम्ममा उक्त कम्पनीको आईपीओमा ११ लाख ५८ हजार ५८५ जना आबेदकबाट १ अर्ब ६० करोड ५७ लाख ३४ हजार रुपैयाँ बराबरको १ करोड ५७ लाख ३४० कित्ता शेयर खरीदको लागि आवेदन परेको हो।

कम्पनीले बिहीवारदेखि सर्वसाधारणका लागि रू. ७ करोड ३६ लाख २८ हजार ६०० बराबरको आईपीओ विक्री खुला गरेको हो । उक्त मूल्य बराबरको प्रतिकित्ता रू. १०० अंकित दरको ७ लाख ३६ हजार २८६ कित्ता आईपीओ कम्पनीले विक्री गर्न लागेका हो ।

सर्वसाधारणका लागि विक्री गरिने कुल शेयरमध्ये २ प्रतिशत अर्थात् १४ हजार ७२६ कित्ता शेयर कर्मचारीहरुका लागि र ५ प्रतिशत अर्थात् ३६ हजार ८१४ कित्ता शेयर सामूहिक लगानी कोषलाई छुट्याइएको छ ।

कम्पनीले कर्मचारी र सामूहिक लगानी कोषका लागि सुरक्षित गरी बाँकी रहेको ६ लाख ८४ हजार ७४६ कित्ता भने कम्पनीले सार्वजनिक निष्कासनमा ल्याएको हो ।

मागभन्दा बढी आवेदन पहिलो दिनमै परिसकेकाले यो आईपीओ छिटोमा साउन १८ गतेसम्म मात्र विक्रीमा रहनेछ । आईपीओ खरिदका लागि न्यूनतम १० कित्तादेखि अधिकतम १ लाख कित्तासम्म माग गर्न सकिने व्यवस्था छ । कम्पनीको आईपीओलाई केयर रेटिङ्ग नेपालले केयर एनपी डि इस्यूअर रेटिङ्ग प्रदान गरेको छ ।