अष्टलक्ष्मी र राजेन्द्रलाई ओलीको मुख्यमन्त्री अफर

काठमाण्डौंः नेकपा एमाले अध्यक्ष केपी शर्मा ओलीले वरिष्ठ नेता माधवकुमार नेपाल समूह कमजोर बनाउन लागेका छन् । वरिष्ठ नेता नेपालले पार्टीमा फर्कन राखेका कुनै प्रस्ताव स्वीकार नगरेपछि ओलीले गुट कमजोर बनाउने रणनीति अख्तियार गरेका हुन् ।

नेता समूहमा रहेका नेतालाई विभिन्न पदको अफर राख्दै गुट कमजोर बनाउने रणनीति अख्तियार गरिरहेका हुन् ।

ओलीले पछिल्लो पटक बागमती प्रदेशको मुख्यमन्त्रीमा नेपाल समूहका दुई नेतालाई अफर गरेपछि अल्मल्याउने रणनीति भन्दै नेताहरुलाई सचेत रहन भनेका छन् ।

ओलीले अष्टलक्ष्मी शाक्य र राजेन्द्र पाण्डेलाई मुख्यमन्त्रीको प्रस्ताव गरेपछि गुट कमजोर बनाउने तर नदिने रणनीति भएको नेताहरुले बताएका छन् ।

बागमती प्रदेशको नीति तथा कार्यक्रम पारित गर्ने बेलामा पाण्डेलाई तत्कालीन प्रधानमन्त्री केपी शर्मा ओलीले बालुवाटार बोलाएर मुख्यमन्त्री बन्न प्रस्ताव गरेका थिए ।

पाण्डेले आफूलाई होइन शाक्यलाई बनाउन सुझाए । तर, ओलीले वर्तमान मुख्यमन्त्री डोरमणि पौडेलभन्दा अष्टलक्ष्मी कमजोर रहेको भन्दै पाण्डेलाई नै बन्न सुझाए ।

हो त नी भन्दै मख्ख परेका पाण्डे जब झसंग भए आफूलाई जस्तै शाक्यलाई पनि ओलीले आश्वासन दिएका थिए । शाक्यलाई पनि त्यस्तो भनेको बताएपछि नेपाल समूहका नेताहरूले यस्ता प्रलोभनमा नपर्न सचेत गराएका छन् ।

समूहको केन्द्रीय समिति बैठक र नेताहरूका अनौपचारिक छलफलमा सबैलाई सचेत गराइएको नेता तथा प्रतिनिधि सभा सांसद मेटमणि चौधरीले जानकारी दिए ।

यसअघि ओलीले तत्कालीन नेकपामा विवाद हुँदा तत्कालीन अध्यक्ष पुष्पकमल दाहाल प्रचण्डलाई पूर्वएमालेमा कोही नभएकोले आफूपछिको नेतृत्व लिन भनेका थिए ।

त्यस्तै, वरिष्ठ नेता माधव नेपाललाई पूर्वएमाले एक हुनुपर्ने प्रस्ताव गरेका थिए ।

आफूपछिको नेतृत्व गर्न समेत भनेका थिए । सँगै उपाध्यक्ष वामदेव गौतमलाई प्रचण्ड र नेपालको विश्वास नभएकोले नेतृत्वको लागि तयार हुन भनेका थिए ।

यो प्रसंगलाई माओवादी अध्यक्ष पुष्पकमल दाहाल प्रचण्डले पटक–पटक सार्वजनिक कार्यक्रममा भन्दै आएका छन् ।

यी सबै उदाहरण दिँदै नेपाल समूहले आउने प्रलोभन नपर्न नेताहरूलाई भनेका छन् । यसअघि ओलीले प्रदेश १ को मुख्यमन्त्रीमा भीम आचार्यलाई प्रस्ताव गरेका थिए । तर, त्यो प्रस्ताव अहिलेसम्म कार्यान्वयन भएको छैन । अभियान टाइम्सबाट