किसान महासङ्घको संयुक्त राष्ट्रिय भेला चितवनमा सुरुः शनिबार चितवन घोषणा पत्र जारी गर्ने

काठमाण्डौंः नेकपा एमाले निकट अखिल नेपाल किसान महासङ्घको संयुक्त राष्ट्रिय भेला आजबाट चितवनमा सुरु भएको छ ।  नेकपा एमालेका स्थायी कमिटी सदस्य रामबहादुर थापाले भेलाको आज भरतपुरमा उद्घाटन गर्नु भएको थियो ।

भेलालाई उद्घाटन गर्दै स्थायी कमिटी थापाले किसानको विकास र समृद्धिले मात्र देश विकास सम्भव हुने बताउनुभयो । उहाँले कृषिको सहकारीकरण गरेर किसानको उत्पादन र बजारीकरणलाई व्यवस्थित गर्नुपर्ने आजको आवश्यकता रहेको बताउनुभयो ।

कार्यक्रममा नेकपा एमाले चितवनका अध्यक्ष पार्वती रावल, राप्ती नगरपालिका प्रमुख प्रभा बराल, बागमती प्रदेशका पूर्व कृषि मन्त्री दावाद्वोर्जे लामा लगायतले आ आफ्नो भनाई राख्नु भएको थियो ।

विषयगत उत्पादक, सामुदायिक र वर्गीय किसानका २२ सङ्गठनका प्रतिनिधिहरूको कार्यक्रममा सहभागिता रहेको छ ।

भोलिसम्म जारी रहने सो संयुक्त राष्ट्रिय भेलामा किसानका सबै प्रदेश कमिटी र ७७ जिल्लाका ३ सयभन्दा बढी किसान प्रतिनिधिको सहभागिता रहेको अखिल नेपाल किसान महासङ्घ चितवनका सचिव सिपी अधिकारीले जानकारी दिनुभयो ।

भेलामा २२ विषयगत सङ्घको समूहगत छलफल हुनेछ भने कृषिमा आत्मनिर्भरता, व्यावसायिक कृषि र कृषिमा आधुनिकीकरणका सन्दर्भमा राष्ट्रिय भेलामा छलफल हुने बताइएको छ ।

अखिल नेपाल किसान महासङ्घका केन्द्रीय अध्यक्ष डा. प्रेम दंगालले भेलाले किसानको समस्या र मुद्दालाई एकताबद्ध ढङ्गले उठान गरी अगाडि लगिने जानकारी दिनुभयो ।

राष्ट्रिय भेला पश्चात् किसान महासङ्घले भोलि शनिबार चितवन घोषणा पत्र जारी गर्ने समेत जनाइएको छ ।

अखिल नेपाल किसान महासङ्घका अध्यक्ष डा.दंगालको अध्यक्षतामा भएको कार्यक्रममा अखिल नेपाल किसान महासङ्घ चितवनका इन्चार्ज शम्भु सुबेदीले स्वागत मन्तव्य व्यक्त गर्नु भएको थियो ।