मन्त्रीमण्डल विस्तारमा ढिलाइ, सत्ता गठबन्धन मन्त्रालय भागवण्डामै अल्झियो

काठमाण्डौः सरकारले सत्ता गठबन्धनमा रहेको दलहरूलाई सहज हुने गरी कानुनी जटिलता हटाए पनि मन्त्रिपरिषद् विस्तारको गाँठो अझै फुकेको छैन । सत्ता गठबन्धनमा आबद्ध दलहरूबीच मन्त्रिपरिषद्लाई पूर्णता दिने विषयमा समझदारी भए तापनि मन्त्रालय भागवण्डाको विषयमा सहमति जुटिनसकेका कारण अझै मन्त्रिपरिषद् विस्तारमा ढिलाइ भइरहेको छ ।

सत्ता गठबन्धनमा आबद्ध नेकपा माओवादी केन्द्रले मन्त्रालयको भागवण्डाको कुरा नमिल्दा अझै मन्त्रीहरूको छनोट गर्न सकेको छैन ।

माओवादी स्थायी समितिको बुधबार बसेको बैठकमा अध्यक्ष पुष्पकमल दाहाल ‘प्रचण्ड’ले बिहीबार गठबन्धनको बैठक बसेर मन्त्रीमण्डलाई पूर्णता दिने जानकारी गराउनुभएको थियो । माओवादीको नेता देवेन्द्र पौडेलले गठबन्धनमा मन्त्रालयको भागवण्डा टुंगो लगेपछि मन्त्रीमण्डल विस्तारको प्रक्रिया अगाडि बढ्ने जानकारी दिँदै भन्नुभयो– ‘उहाँका अनुसार मन्त्रालयको भागवण्डामा सहमति जुटेलगत्तै पार्टीको बैठक बसेर मन्त्रीहरूको नाम छनोट हुनेछ ।’

जसपाले पनि मन्त्रालयको भागवण्डामा अझै सहमति नजुटेका कारण मन्त्री छनोटको गर्न नसकिएको बताएको छ । जसपाका नेता महेन्द्र राय यादवले मन्त्रालयमै कुरा मिल्न नसकेकाले मन्त्री छनोट हुन नसकेको बताउँदै भन्नुभयो– ‘राजनीतिक दल विभाजनसम्बन्धी अध्यादेश खारेज गरेर सरकारले हाम्रो माग पूरा गरेको छ, अब मन्त्रालयको कुरा मिलेपछि मन्त्री छनोट गरेर सरकारमा सहभागी हुन्छौं ।’

सत्ता गठबन्धनमा आबद्ध नेकपा एकीकृत समाजवादीले भने सरकारमा सहभागी हुने मन्त्रीहरूको नामको टुंगो लगाएको छ । तर, कुन–कुन मन्त्रालय लिने भन्ने विषयमा भने एकीकृत समाजवादी पनि अन्योलमै रहेको छ । नेकपा एकीकृत समाजवादीका नेता मेटमणि चौधरीले पार्टीबाट सरकारमा सहभागी हुने व्यक्तिहरूको नाम टुंगो लगाए पनि मन्त्रालय भागवण्डामा समझदारी हुन बाँकी रहेको बताउनुभयो । उहाँले भन्नुभयो– ‘सरकारमा सहभागी हुन हामी तयार छौं, सत्ता गठबन्धनमा समझदारी भएलगत्तै मन्त्रीहरूको नाम बुझाउँछौं ।’नेपाल समाचारपत्रबाट