एकीकृत शक्ति नेपालको घोषणापत्र सार्वजनिक

काठमाडौंः हिन्दु धर्मको पक्षधर एकीकृत शक्ति नेपालले बुधबार आफ्नो घोषणापत्र सार्वजनिक गरेको छ।

पृथ्वीनारायण शाहको विचारलाई मार्गदर्शक सिद्धान्तका रुपमा अवलम्बन गरेको उक्त दलले ललितपुरमा बुधबार केही सञ्चारगृहका सम्पादक तथा पत्रकारहरुसँग छलफलका क्रममा आफ्नो घोषणापत्र सार्वजनिक गरेको हो।

उक्त दलले नेपाली कांग्रेसका संस्थापक नेताहरु बिपी कोइराला, कृष्णप्रसाद भट्टराई र गणेशमान सिंह तथा नेकपा एमालेका नेता मदन भण्डारीलाई प्रेरक व्यक्तित्वका रुपमा उल्लेख गरेको जनाएको छ।

छलफलमा उक्त दलका अध्यक्ष तथा बरिष्ट पत्रकार देवप्रकाश त्रिपाठीले हिन्दु धर्मको एजेन्डामा सबै दलहरु गएको उल्लेख गर्दै आफ्नो दल अठोट र प्रतिबद्धतामा अन्य दलहरुभन्दा फरक रहने उल्लेख गरे।

वरिष्ठ उपाध्यक्ष डा. रामप्रसाद उप्रेतीले मार्क्स र एंगेल्सका कम्युनिष्ट मेनिफेस्टोबाट अब देश अगाडि बढ्न नसक्ने उल्लेख गर्दै जीवनको बाँकी समय देश निर्माणमा खर्च गर्ने बताए।

त्यस्तै, महासचिव डा. बिपी तिमिल्सिनाले नेपाल जडिबुटी र मौलिक परम्पराका लागि परम्परागत रुपमा चिनिएको र अब पनि त्यही चिनारीबाट आर्थिक तथा सांस्कृतिक रुपमा विश्वमै चिनिन सक्ने बताए।

उक्त दलले पर्यावरणीय अवस्था, जनताको खुसी, इतिहास र सभ्यताको रक्षा, सुशासन, मौलिक धर्म, संस्कृति तथा परम्पराको संरक्षणलाई विकासको मापदण्डका रुपमा अगाडि बढाएको छ। साथै उक्त दलले शुक्रबार चुनावी चिह्न सार्वजनिक गर्ने जनाएको छ ।