सुर्खेतमा कांग्रेसको नौ स्थानीय तहमा चुनिए नयाँ नेतृत्व, सबै देउवा पक्षका

स्थानीय तहमा पार्टी नेतृत्व चयनका लागि कुनै ठाउँमा निर्वाचन र कुनै ठाउँमा सर्वसम्मत नेतृत्व चयन भएको कांग्रेसका सहायक जिल्ला निर्वाचन अधिकृत दुर्गाप्रसाद सापकोटा जानकारी दिए ।

उनका अनुसार गुर्भाकोट नगरपालिकामा हस्तबहादुर पुन, लेकबेँसी नगरपालिकामा उमेश पौडेल, चिङ्गाड गाउँपालिकामा डोरप्रसाद शर्मा, भेरीगंगा नगरपालिकामा रामबहादुर सिंह, बराहताल गाउँपालिकामा भीमबहादुर भण्डारी र सिम्ता गाउँपालिकामा वीरेन्द्र रावत सभापति पदमा निर्वाचित भएका छन् ।

त्यस्तै वीरेन्द्रनगरमा उपेन्द्र खड्का, पञ्चपुरी नगरपालिकामा कृपाराम थापा र चौकुने गाउँपालिकाको कार्यसमिति सभापति पदमा नरबहादुर बान्तोला चुनिएका छन् । गुर्भाकोट र लेकबेँसी नगरपालिकाबाहेक अन्य स्थानीय तहमा निर्वाचनमार्फत नयाँ नेतृत्व चयन भएको हो ।

स्थानीय तहको नेतृत्वमा सुर्खेका नौवटै पालिकामा सभापति शेरबहादुर देउवा पक्षको नेतृत्वमा आएको छ । सुर्खेतमा प्रदेशसभाका चार निर्वाचन क्षेत्रमा आज नयाँ नेतृत्व चयन गर्ने कार्यक्रम छ । न्युज कारखाना