माधव नेपालको पार्टीलाई चुनाव जित्न दिन्नौँ : महासचिव पोखरेल

काठमाडौंः प्रमुख प्रतिपक्षी दल नेकपा एमालेका महासचिव शङ्कर पोखरेलले माधवकुमार नेपाल नेतृत्वको नेकपा एकीकृत समाजवादीलाई चुनाव जित्न नदिने बताएका छन् ।

अखिल नेपाल महिला सङ्घले आज (बिहीबार) काठमाडौंमा आयोजना गरेको प्रशिक्षक प्रशिक्षण कार्यक्रममा पोखरेलले एकीकृत समाजवादी भविष्यमा अस्तित्व नै नरहने अवस्था सिर्जना गर्ने बताएका हुन् ।

‘अहिले हामीले माधव नेपालको पार्टीलाई किन मान्यता दिएका छैनौँ भन्दा त्यसलाई हराइदिने हो । भविष्यमा त्यो पार्टी अस्तित्वमा नरहोस् भन्नका लागि हामीले चुनाव नजित्ने खालको स्थिति बनाउनैपर्छ’ पोखरेलले भने ।

चुनावमा हारेपछि सो पार्टी एमालेमै समाहित हुने उनको दाबी छ । ‘जसरी विगतमा नेकपा माले भन्ने पार्टी गठन भएको थियो । सबैतिर चुनाव हराइदिएपछि के भयो रु झोली झुम्टा बोकेर सबै कमरेडहरु अब हामी घरै फर्कियौँ भनेर आउनुभयो । पार्टी सकियो’ पोखरेलले भने ।

महासचिव पोखरेलले अरु साना कम्युनिस्ट पार्टीलाई पनि चुनावमा हराएर एमालेमा समाहित गर्ने बताए । ‘नेता जोडेर बलियो कम्युनिस्ट पार्टी बनाउन खोज्यौँ सम्भव भएन । अब कार्यकर्ता जोडेर कम्युनिस्ट पार्टी बलियो बनाउनुपर्छ । त्यसका लागि साना पार्टीहरुलाई चुनावमा हराइदिने र कार्यकर्तालाई आफूसित ल्याउने’ उनले भनेका छन् ।

पोखरेलले अघि भने, ‘अब हाम्रो बाटो एमालेलाई नेपालको वामपन्थी आन्दोलनको एक मात्र शक्ति बनाउने हो । अहिले थुप्रै छन् । तर, ती पार्टीहरुलाई हामीले चुनाव जित्न नसक्ने तहमा पुर्‍यायौँ भने हराएर जान्छन् ।’

नेपालमा ठुलो पार्टी फुटाएर जानेहरु कसैले पनि ठुलो पार्टी बनाउन नसकेको उनले बताए । ‘मोहन वैद्यहरु एक प्रकारले प्रचण्डकै हाराहारीको शक्ति लिएर विभाजित भएका थिए । तर, आज कस्तो अवस्था छ ? कुनै ठाउँमा चुनाव लडेर चुनाव जित्ने ठाउँ छ र ? छैन’ उनले थपे, ‘चुनाव जित्न नसक्ने भएपछि भनिरहेका छन् हामी क्रान्तिकारीहरु हो चुनावमा भाग लिँदैनौँ ।’

अबको राजनीतिक व्यवस्था आर्थिक विकास र समृद्धिको भएकाले सरकारको नेतृत्व गर्न नसक्ने दलको अर्थ नहुने पोखरेलले बताए ।

‘आर्थिक अवस्थामा रुपान्तरणको राजनीतिभित्र सरकारको नेतृत्व गर्न नसक्ने पार्टीहरुको के अर्थ छ र ? केही पनि छैन । यस अर्थमा नेपालमा सानातिना पार्टीहरु बिस्तारै हराउँदै जान्छन् । र त्यसको ठाउँ ठुला पार्टीले लिन्छन्’ उनले भने ।