ठाउँठाउँमा वाम तालमेल

काठमाण्डौ्ः पाँचदलीय सत्तागठबन्धनमा रहेका वाम घटक र एमालेबीच केन्द्रीय तहमा तिक्ततापूर्ण आरोप–प्रत्यारोप छ । तर, कैयौँ स्थानीय तहमा भने उनीहरूबीच नै तालमेल छ । चुनावमा आफू अनुकूल नतिजा निकाल्न दलहरू विरोधाभास तालमेलमा उत्रिएका छन् भने कैयौँ ठाउँ वाम तालमेल पनि देखिएको छ ।

डेढ दर्जनभन्दा बढी स्थानीय तहमा सत्तारूढ दल कांग्रेस, माओवादी केन्द्र, नेकपा एकीकृत समाजवादी र जसपा एमालेसँग तालमेल गरेर अर्को सत्तारूढ दलसँग चुनाव लड्दै छन् । सकेसम्म सबै दल मिलेर तालमेल गर्ने र मिल्न नसकेका स्थानमा गठबन्धनभित्रैका दलबीच स्वस्थ रूपमा आपसी प्रतिस्पर्धा गर्ने गठबन्धनको निर्णय छ । तर, कतिपय स्थानमा उनीहरूले एमालेसँग मिलेर मोर्चाबन्दी गर्दै गठबन्धनभित्रैका दलसँग प्रतिस्पर्धा गर्दै छन् । गठबन्धन प्रभावकारी कार्यान्वयनमा नआएपछि शीर्ष नेताहरूले नै सार्वजनिक रूपमा असन्तुष्टिसमेत पोखिरहेका छन् । सत्तारूढ गठबन्धनले केन्द्रीयस्तरमै पाँचदलीय गठबन्धन बनाएर एमालेसँग प्रतिस्पर्धा गर्दै छ ।

एमालेले कमल थापा नेतृत्वको राप्रपा नेपाल र परिवार दलसँग सूर्य चिह्नमा चुनाव लड्ने गरी तालमेल गरेको छ । स्थानीय आवश्यकताअनुसार छिटपुट स्थानमा उसले राजेन्द्र लिङ्देन नेतृत्वको राप्रपा र विप्लव नेतृत्वको नेकपा मात्रै होइन, सत्तागठबन्धनभित्रैको जसपासँगसमेत तालमेल गरेको छ ।

झापाको कचनकवल गाउँपालिकामा राप्रपाविरुद्ध एमाले र कांग्रेसले गठबन्धन गरेका छन् । अघिल्लो निर्वाचनमा त्यहाँ राप्रपाबाट अध्यक्ष र उपाध्यक्ष निर्वाचित भएका थिए । अध्यक्षमा कांग्रेसका तर्फबाट कालेन्द्रप्रसाद सिंह राजवंशी र उपाध्यक्षमा एमालेका नवराज भट्टराई उम्मेदवार छन् ।

एमाले अध्यक्ष केपी ओलीको गृहनगर दमक नगरपालिकामा सत्तारूढ गठबन्धनमा लिङ्देन नेतृत्वको राप्रपा पनि मिसिएको छ । पाँचथरको फाल्गुनन्द गाउँपालिकामा सत्तारूढ दल जनता समाजवादी पार्टीले एमालेसँग तालमेल गरेको छ । अध्यक्ष एमालेलाई छाडेर जसपाले उपाध्यक्ष पद लिएको छ ।

नुवाकोटको किस्पाङमा माओवादी केन्द्र र सिन्धुलीको मरिण गाउँपालिकामा माओवादी केन्द्रका विद्रोही उम्मेदवारले एमालेसँग तालमेल गरेका छन् । ती गाउँपालिकाहरूमा माओवादी केन्द्रका असन्तुष्ट उम्मेदवारले सूर्य चिह्न लिएर लड्दै छन् । सिन्धुलीको मरिणमा अध्यक्षमा एमालेका गोविन्दलाल माझी र उपाध्यक्षमा माओवादी केन्द्रकी विद्रोही उम्मेदवार संगीता माझी सूर्य चिह्न लिएर उठेकी छिन् ।

सिन्धुपाल्चोकको सुनकोसी गाउँपालिकामा पनि एमाले र माओवादीबीच तालमेल भएको छ । त्यहाँ अध्यक्षमा एमालेका टपिन्द्र तिमल्सिना र उपाध्यक्षमा माओवादी केन्द्रकी दुर्गा थापा उम्मेदवार छिन् । त्यहाँ कांग्रेस एक्लैले एमाले–माओवादी गठबन्धनसँग प्रतिस्पर्धा गर्दै छ ।

मेलम्ची नगरपालिकामा कांग्रेसले पाँचदलीय गठबन्धनबाहिरको राप्रपासँग बेग्लै गठबन्धन बनाएको छ । त्यहाँ कांग्रेसबाट आइतमान तामाङ मेयरका उम्मेदवार छन् भने कुमारी स्याङ्तान राप्रपाबाट उपमेयरकी उम्मेदवार छन् ।

रुकुम पूर्व र रोल्पामा कांग्रेस र नेत्रविक्रम चन्द नेतृत्वको नेकपा र गुल्मीमा माओवादी केन्द्र पनि एमालेसँगको तालमेलमा जोडिएको छ । गठबन्धन दलले विपक्षी एमालेसँग तालमेल नगर्ने निर्णय गरे पनि स्थानीय तहमा भने स्थानीय पार्टीहरूले उल्लंघन गर्दै तालमेललाई निरन्तरता दिएका हुन् ।

रुकुम पूर्वमा सत्तारुढभित्रको माओवादी केन्द्रविरुद्ध सरकारको नेतृत्व गरिरहेको कांग्रेसले नै एमालेसँग मोर्चाबन्दी गरेको छ । भुमे गाउँपालिका र सिस्नेमा कांग्रेसलाई अध्यक्ष दिएर एमालेले उपाध्यक्ष लिएको छ । उता, पुठाउत्तरगंगामा एमालेले अध्यक्ष र कांग्रेसले उपाध्यक्ष लिएको छ ।

गुल्मीको कालिगण्डकीमा माओवादी केन्द्रले सूर्य चिह्नमा लड्ने गरी उपाध्यक्ष लिएर एमालेको अध्यक्षलाई मत दिने सहमति गरेको छ । धुर्कोट गाउँपालिकामा भने अध्यक्ष माओवादीलाई दिएर उपाध्यक्ष एमालेले लिएको छ । माओवादीले अध्यक्ष लिएको गाउँपालिकामा भने एमाले आफ्नै सूर्य चिह्नबाट लड्ने लुम्बिनी प्रदेशका एमाले अध्यक्ष राधाकृष्ण कँडेलले बताए ।

रोल्पाको माडीमा अध्यक्ष एमाले र उपाध्यक्ष कांग्रेसले, त्रिवेणीमा अध्यक्ष एमालेलाई र उपाध्यक्ष कांग्रेसले लिएर माओवादी केन्द्रसँग चुनावी प्रतिस्पर्धा गर्दै छन् । त्यस्तै, विप्लव नेतृत्वको नेकपा, कांग्रेस र एमालेको त्रिपक्षीय तालमेलमा विप्लव नेतृत्वको नेकपालाई रोल्पाकै सुनसहरी गाउँपालिका अध्यक्ष दिइएको छ । त्यहाँ उपाध्यक्ष कांग्रेस र बहुमत वडा एमालेले लिएर चुनाव लड्दै छन् ।

एमाले कर्णाली प्रदेश इन्चार्ज यमलाल कँडेलका अनुसार कालिकोटका स्थानीय तहमा पनि एमाले र माओवादी केन्द्रबीच तालमेल छ । महावै गाउँपालिकामा माओवादी केन्द्रले एमालेलाई उपाध्यक्ष दिएर तालमेल गरेको छ । त्यहाँ माओवादी केन्द्रबाट अध्यक्षमा खेमबहादुर सिंह र उपाध्यक्षमा एमालेबाट दानसिंह सेजुवाल उम्मेदवार छन् ।

त्यस्तै, डोल्पा र हुम्लाका कतिपय गाउँपालिकामा नेकपा एकीकृत पनि एमालेसँग तालमेल गरेको छ । हुम्लाको चंखेली गाउँपालिकामा एमाले र नेकपा एकीकृत समाजवादीबीच तालमेल भएको छ । अध्यक्षमा एमालेका विमलकुमार शाही र उपाध्यक्षमा नेकपा एकीकृतकी प्रेमकला शाही उम्मेदवार छन् । त्यहाँ माओवादीले अध्यक्ष र कांग्रेसले उपाध्यक्ष लिएर तालमेल गरेका छन् ।

एमाले नेता भीम रावलको गृह जिल्ला अछामको मल्लेख गाउँपालिकामा पनि एमालेसँग एमालेबाटै फुटेर बनेर सत्तागठबन्धनमा रहेको दल नेकपा एकीकृत समाजवादीले चुनावी तालमेल गरेको छ । अध्यक्षमा एमालेबाट भीम खड्का र उपाध्यक्षमा नेकपा एसकी समिता महरा उम्मेदवार छन् ।

साँफेबगर नगरपालिकामा एमाले र माओवादी केन्द्रबीच तालमेल छ । मेयरमा एमालेका पशुपति कुँवर र उपमेयरमा माओवादी केन्द्रका रणबहादुर थापा उम्मेदवार छन् । त्यहाँ माओवादीले एमालेको सूर्य चिह्नबाटै चुनाव लड्दै छ ।

जहाँ छ वाम तालमेल

नुवाकोटको किस्पाङमा माओवादी केन्द्र र सिन्धुलीको मरिण गाउँपालिकामा माओवादी केन्द्रका विद्रोही उम्मेदवारले एमालेसँग तालमेल गरेका छन् ।

सिन्धुपाल्चोकको सुनकोसी गाउँपालिकामा पनि एमाले र माओवादीबीच तालमेल भएको छ ।

गुल्मीको कालिगण्डकीमा माओवादी केन्द्रले सूर्य चिह्नमा लड्ने गरी उपाध्यक्ष लिएर एमालेको अध्यक्षलाई मत दिने सहमति गरेको छ । धुर्कोट गाउँपालिकामा भने अध्यक्ष माओवादीलाई दिएर उपाध्यक्ष एमालेले लिएको छ ।

कालिकोटको महावै गाउँपालिकामा माओवादी केन्द्रले एमालेलाई उपाध्यक्ष दिएर तालमेल गरेको छ ।

हुम्लाको चंखेली गाउँपालिकामा एमाले र नेकपा एकीकृत समाजवादीबीच तालमेल भएको छ ।

अछामको मल्लेख गाउँपालिकामा पनि एमालेसँग एमालेबाटै फुटेर बनेर सत्तागठबन्धनमा रहेको दल नेकपा एकीकृत समाजवादीले चुनावी तालमेल गरेको छ । साँफेबगर नगरपालिकामा एमाले र माओवादी केन्द्रबीच तालमेल छ । नयाँपत्रिकाबाट