पहिलो पटक उत्पादन वृद्धि गर्ने बजेट ल्याइएको छः अध्यक्ष दाहाल

काठमाडौंः नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले मुलुकमा नै पहिलो पटक उत्पादन वृद्धि गर्ने लक्ष्य राखेर किसानलक्षित बजेट प्रस्तुत गरिएको बताउनुभएको छ ।

पार्टी सम्वद्ध सम्पर्क समन्वय प्रदेश समितिले आयोजना गरेको कार्यक्रममा उहाँले माओवादीले नै किसानलक्षित बजेट प्रस्तुत गरिएका कारण प्रतिक्रियावादी, बुर्जुवा र जनविरोधी तत्त्व सलबलाएर हुने/नहुने आरोप लगाएको बताउनुभयो ।

अध्यक्ष दाहालले माओवादीमाथि अनेकन् आरोप लगाएर जनतालाई भ्रमित पार्ने षड्यन्त्र भइरहेको उल्लेख गर्दै उहाँले आफ्नो पार्टीबिना मुलुकको विकास समेत सम्भव नभएको बताउनुभयो ।

आगामी तीन महिना माओवादीका लागि अझै चुनौतीपूर्ण रहेको भन्दै उहाँले सङ्घीय र प्रदेश सभाको निर्वाचनमा श्रेष्ठता हासिल गर्नुपर्नेमा जोड दिनुभयो ।

पूर्व प्रधानमन्त्री समेत रहनुभएका अध्यक्ष दाहालले १२ बुँदे व्याख्यात्मक घोषणासहित एमसिसी पास गराउन र एसपिपीमा सहभागी नहुने पत्र अमेरिकालाई पठाउन पनि माओवादीकै कारण सम्भव भएको जानकारी दिनुभयो । रासस