जगन्नाथ पौडेलसँग असन्तुष्ट बनेको समूहले कांग्रेसका बागी दिनेश कोइरालालाई सर्मथन गर्ने

काठमाण्डौंः स्थानीय तहको निर्वाचनमा नेपाली कांग्रेसबाट विद्रोह गरेर उम्मेदवारी दिएको जगन्नाथ पौडेल समूहलाई ठूलो झट्का लागेको छ । गत स्थानीय तहको निर्वाचनमा भरतपुर महानगरपालिकाको मेयरमा माओवादीलाई सर्मथन गरेको भन्दै कांग्रेसबाट विद्रोह गरेर उम्मेदवारी दिएको जगन्नाथ समूहमा फुट आउँदा चितवनमा राजनीतिक खैलाबैला नै मचिएको छ ।

समूहमा फुट आएपछि जगन्नाथ पौडेल र शम्भु अर्यालहरू एकातिर छन् भने पूर्वसांसद भीमबहादुर श्रेष्ठ, पूर्वपार्टी सभापति कृष्णलाल सापकोटा र महासमिति सदस्य मीना खरेल अर्कोतिर उभिएका छन् । यो फुट संघीय निर्वाचनमा पौडेलले उम्मेदवारी दर्ता गराएपछि सिर्जना भएको हो।

स्थानीय तह निर्वाचनमा उठेका अनुहार नै संघीय निर्वाचनमा पनि उठ्दा राम्रो सन्देश नजाने तर यसलाई चेन्ज गरौं भन्दा नमानेपछि आफूहरू त्यहाँ रहन उपयुक्त नभएकोले बाहरिएको खरेलले बताए ।

जिल्ला निर्वाचन कार्यालय चितवनका अनुसार संघीय निर्वाचनमा पौडेलले उम्मेदवारी दर्ता गरेका छन् । भरतपुर महानगरको मेयरमा खर्च विवरण नबुझाएका पौडेलले ७ लाख ५० हजार जरीवाना तिरेर असोज २३ गते उम्मेदवारी दर्ता गराएका हुन् ।

पौडेलले अरुलाई नै प्रस्तावक र सर्मथक राखेर उम्मेदवारी दर्ता गराएपछि समूहमा फुट तिर गएको हो । तर ‍पौडेल भने सबै कार्यकर्ता र मतदाताको सहयोगमा उम्मेदवार बनेको बताउछन् । जगन्नाथ पौडेलसँग असन्तुष्ट बनेको समूहले कांग्रेसका बागी दिनेश कोइरालालाई सर्मथन गर्ने भएको छ ।